Премиерот Заев: Владата отвора постојана комуникација со граѓанските организации за борба против сиромаштијата

 

Претседателот на Владата на Република Македонија, Зоран Заев, денеска прими во посета делегација на „Македонска платформа за борба против сиромаштија“, предводена од Претседателката на оваа мрежа од граѓански организации, Билјана Дуковска.

Во име на министерката за труд и социјална политика Мила Царовска, на средбата во кабинетот на премиерот, присуствуваше Санела Шкријељ, шеф на кабинетот на министерката.


Во име на платформата, претседателката Дуковска го запозна премиерот Заев со мисијата на оваа мрежа која освен постојаната борба, мерки и акции за намалување на сиромаштијата, има за цел и унапредување на принципите на еднаквост, солидарност, недискриминација, промоција и заштита на човековите права и слободи на сите луѓе во Република Македонија. Таа го замоли премиерот Заев за дополнителна поддршка на нивните акции со што нивната мисија ќе биде повидлива, и изрази надеж дека новата влада ќе ја прифати „Македонската платформа за борба против сиромаштијата“ како партнер во креирањето на политиките и во одредувањето на мерките од кои се очекува решавање на едно од најгорливите прашања за одделни граѓани и групи во земјата.


Премиерот Заев ги информираше членовите на мрежата дека е добро запознаен со активностите на платформата и дека целосно ја поддржува нивната работа. Во исто време, премиерот Заев истакна дека и тој, како и министерката Царовска која многу добро ја познава работата на сите граѓански организации вклучени во оваа платформа бидејќи била дел од некои од нивните проекти, секогаш имаат отворена врата за нивните предлози и иницијативи.


Членовите на делегацијата кои претставуваат организации што застапуваат различни целни групи најмногу погодени од сиромаштијата како Роми, жени, пензионери и други, го запознаа Претседателот на Владата Зоран Заев со специфичните проблеми со кои се соочуваат припадниците на овие целни групи, кои главно се лоцираат во дискриминацијата на пазарот на трудот, во социјалната заштита, во здравствената сфера, како и во делот на еднаков пристап до социјалните мерки на Владата на РМ.

Премиерот Заев и претставниците на „Македонска платфрома за борба против сиромаштија“, се договорија дека ќе отворат постојана комуникација за заедничка потрага по решенија за ефикасна борба против сиромаштијата, и дека ќе воспостават практика на заедничка соработка која ќе биде континуирана и која ќе ја намалува сиромаштијата кај сите погодени граѓани и групи.