Зголемување на приходите на општините со промени во распределбата на надоместокот од издадени концесии за користење на водните ресурси за производство на електрична енергија се предвидува со измените и дополнувањата на Законот за води.

Предложените измени кои се усвоени на вчерашната владина седница, како што информира денеска на прес-конфенренција министерот за животна средина и просторно планирање Абдулаким Адеми, ќе се одвиваат постепено и тоа до 31 декември 2015 година од остварениот приход од концесиите на општините ќе се уплаќаат 25 отсто од надоместокот, а во централниот буџет 75 проценти. Од 1 јануари 2016 година општините ќе добиваат половина од уплатениот надоместок од концесиите за користење на водените ресурси.

- Ваквото постепено зголемување на надоместокот кој ќе припадне на општините се прави со цел тие да можат да ги изградат своите капацитети во однос на управувањето со водите и спроведувањето на Законот за водите. Сметаме дека надоместокот од концесиите за општините ќе претставува значаен придонес во нивниот буџет со кој тие ќе можат да располагаат и да го користат за потребите на граѓаните на локално ниво, истакна Адеми, појаснувајќи дека до сега сите средства одеа во државниот буџет.

Со отпочнување на изградбата на планираните хидроцентрали во Македонија и со измените на Законот за водите, Владата, рече тој, ќе обезбеди редовен извор на средства за општините со ко ќе се зајакне нивната финансиска самостојност.

- Овие средства ќе овозможат подобрување на инфраструктурните објекти за водоснабдување, одведување и третман на отпадните води, а преку редовните приходи што ќе ги добиваат со предложените измени на Законот за води ќе им се овозможи на општините самостојно да управуваат со проекти и да ја обезбедат потребната локална контрибуција при аплицирање за донации, додаде министерот Адеми.