Владата на Република Македонија во континуитет го реализира проектот за набавката на најсовремена медицинска опрема во вредност од над 100 милиони евра, што претставува најголемата инвестиција во македонското здравство во последните 20 години. Целта на проектот е обезбедување на современа здравствена заштита и подобрување на квалитетот на здравствените услуги на населението.

Владата на Република Македонија заради зголемување на ефикасноста на образовниот процес го реализира проектот Компјутер за секое дете. Станува збор за најголемата инвестиција во образованието во изминатите 17 години. Со овој проект се обезбедени 17.818 персонални компјутери, 98.710 ЛЦД-монитори, 98.710 тастатури и глувчиња и 80.892 тин-клиенти за основните и средните училишта во Македонија.

Отворање на нови универзитети и диспензирани студии е еден од многуте јасно и прецизно наведени проекти, со рокови за нивно исполнување, од страна на Владата на Република Македонија што беше успешно реализиран.

Добрата инфраструктура е основа за забрзан економски раст и развој, подобра конкурентност на стопанството, побрз проток на луѓе, стоки и патници. Со оглед на тоа што Република Македонија се наоѓа на главните коридори исток-запад (Коридор 8) и север-југ (Коридор 10 ), Владата ќе продолжи со реализација на капитални инфраструктурни проекти кои ќе придонесат за зголемување на конкурентноста на националната економија, повисок економски раст и порамномерен регионален развој.