Премиерот Заев на средбата со Претседателот на Здружението на судии Саити: Ни претстои процес на враќање на кредибилитетот на судските институции

Претседателот на Владата на Република Македонија Зоран Заев денеска прими делегација на Здружението на судиите на Република Македонија што ја предводеше претседателот на здружението д-р Џемаили Саити, судија во Врховниот суд на Република Македонија.

Претседателот на Здружението на судиите д-р Џемаили Саити, изрази благодарност за можноста здружението да учествува во досегашните процеси за реформи во правосудниот систем, и изрази подготвеност здружението како организација, како и неговите членови, и понатаму да партиципираат активно во овие важни реформски зафати.

Судијата Џемаили на средбата истакна дека судиите и вработените во правосудството очекуваат реализација на предвидените најавени промени што треба да ги донесат најавените закони за судовите и за Судскиот Совет, особено во делот на менувањето на сликата за судството, но и во делот на можностите за поголема финансиска самостојност и за усогласување на платите во правосудтвото соодветно за новите законски решенија.

Премиерот Заев го поздрави досегашниот ангажман на Здржението на судиите во подготовката на реформските процеси и во креирањето на новите законски решенија за законите за судовите и за Судскиот Совет, и изрази надеж и увереност дека конструктивната соработка со здружението ќе продолжи и во фазата на јавната расправа за новите законски решенија.

Претседателот на Владата на Република Македонија Зоран Заев нагласи дека ја очекува натамошната ангажираност на Здружението на судиите на Република Македонија и во периодот на имплементација на реформските закони во правосудството и дека секоја идеја, предлог и конструктивна критика за формирањето и за работењето на Советот за имплементацијата на реформите во правосудството, што ќе дојде од судиите, ќе биде многу значајно за да се врати кредибилитетот на судските институции.