Спасовски по повод почетокот на рамазанскиот пост: Во најблагородниот месец за муслиманите, кога преовладува духот на љубовта, трпението и дарежливоста, да се справиме со предизвиците и да ги ублажиме последиците предизвикани од коронавирусот

Претседателот на Владата на Република Северна Македонија, Оливер Спасовски, по повод светиот месец Рамазан, упати писмо до Исламската верска заедница и до Реис Ул Улема, Хаџи Сулејман Ефенди Реџепи, и  до членовите на Ријасетот, како и до сите верници од исламската вероисповед во Република Северна Македонија.
 
Во писмото со честитки по повод Рамазан, се истакнува дека најсветиот месец во духовниот живот на муслиманите и претставува еден од столбовите на Исламот, кој повикува на добрина, простување и милосрдие.
 
„Во овие тешки моменти, кои на светско ниво ги донесе оваа пандемијата и здравствено-економската криза предизвикана од коронавирусот КОВИД-19, токму овие начела на почитување и солидарност се понеопходни од кога и да било. рамазанските празници се денови во кои се грижиме за другите, пред се за слабите и немоќните, како и за нашите највозрасни, кои претставуваат меморија и мудрост на нашата заедница“, пишува премиерот Спасовски во честитката по повод почетокот на рамазанскиот пост.
 
Спасовски нагласува дека во светиот месец на постот, на соочувањето со искушенијата, преку одрекувањето и воздржувањето се покажува и највисока грижа за другите, и порачува дека годинава треба да се прифати дека рамазанските денови треба да се поминат во потесниот круг на семејството, и на тој начин да го заштитиме здравјето на нашите роднини, пријатели и комшии, но и нашето здравје.
 
„Во најблагородниот и најсреќниот месец  за муслиманите и во духот на љубовта, трпението, несебичноста и дарежливоста, да се справиме со предизвици и  да ублажиме последиците предизвикани од коронавирусот“, вели во честитката по повод почетокот на рамазанскиот пост премиерот Спасовски, со желби деновите на рамазанскиот пост верниците да ги поминат во слога и спокојството на домот, во добро здравје и духовна сила.