Средба на премиерот Спасовски со словенечкиот амбасадор Јазбец: Северна Македонија покажа голем потенцијал за демократски развој, очекувањата се да продолжи по сигурниот европски пат

Претседателот на Владата на Република Северна Македонија, Оливер Спасовски, се сретна со Милан Јазбец, амбасадор на Република Словенија кој го завршува својот мандат во нашата држава.

На средбата се потврдени силните пријателски односи помеѓу двете држави и големата поддршка што ја има нашата земја, од Словенија, во евроинтеграцискиот процес и е констатирано интензивирање на соработката на државите во изминатите неколку години.  

На состанокот е оценето дека Северна Македонија и со реализацијата на парламентарните избори покажа голем потенцијал за натамошен демократски развој. Констатирано е дека земјава бележи голем напредок во изминатите три години, што ретко кој веруваше дека е возможно да се случи, преку затворањето на билатералните прашања со соседите, членството во НАТО, отворените европски перспективи. Констатирано е дека сето тоа е резултат на визијата, планот и политичката волја на водството на земјава. При тоа, изразена е согласност дека сега треба да се продолжи со реализацијата на големиот проект ЕУ, што носи добар живот на граѓаните и резултати на економски план.

Премиерот Спасовски му врачи благодарница на словенечкиот амбасадор Јазбец за неговиот личен голем придонес во демократските процеси во државава, како и за големата пријателска поддршка од Република Словенија.

„Сите крупни прашања ги затворивме, се реализираат стратешките цели, членството во НАТО и исчекорот во евроинтеграциите и сето тоа можеше да се постигне само со искрени пријатели како што сте Вие и Република Словенија. Сега, по изборите, сме фокусирани на формирањето на институциите согласно законските и уставни рокови, коишто ќе го продолжат евроинтеграцискиот развој на државата, бидејќи граѓаните одбраа сигурен и извесен пат за развој на земјата, на реализираните, здравствено безбедни, слободни, фер и демократски парламентарни избори“, рече премиерот Спасовски.

На средбата е констатирано дека потврда за пријателството меѓу Република Северна Македонија и Република Словенија е и добрата соработка меѓу владите на двете држави за време на здравствената криза како и за соработката на економски план, што се очекува уште повеќе да се унапредува во следниот период.