Ковачевски: Поддршката на Холандија за нашата евроинтеграциja е силна мотивација

Претседателот на Владата на Република Северна Македонија Димитар Ковачевски го прими амбасадорот на Холандија во нашата земја Јан Дирк Коп, кој на премиерот и на новата Влада им посака успех во претстојниот мандат.

Премиерот Ковачевски на средбата ја истакна интензивната соработка меѓу Северна Македонија и Холандија на највисоко ниво во последните години со што се зацврсти пријателството меѓу двете земји на билатерален план, како и на планот на поддршката на евроинтеграцискиот процес на нашата земја.

Взаемното партнерство, беше нагласено на средбата, се остварува на исклучително задоволително рамниште од двете страни со постојано исполнување на Декларацијата за партнерство и соработка што двете земји ја потпишаа во 2017 година.

Амбасадорот Коп покажа посебен интерес за средбата на премиерот Ковачевски со неговиот колега Кирил Петков од Бугарија и изрази надеж дека обновената комуникација меѓу двете влади ќе го поттикне очекуваниот напредок во процесот за членство на Северна Македонија во ЕУ со одржување на првата Меѓувладина седница за отворање на поглавјата.

Премиерот Ковачевски потенцираше дека како земја што има стриктен пристап кон објективното вреднување на пристапните критериуми, поддршката на Холандија е потврда дека со посветеноста на европската реформска агенда, Северна Македонија е целосно подготвена за отворање на преговорите.