Petrovska – Taner: stabiliteti, siguria dhe prosperiteti i Ballkanit Perëndimor janë thelbësore për sigurinë e Evropës

Ministrja Sllavjanka Petrovska sot në Krems u takua me ministren austriake të Mbrojtjes, Klaudia Tanner, me të cilën bisedoi për nevojën e dialogut dhe bashkëpunimit intensiv në lidhje me sfidat e sigurisë me të cilat përballet kontinenti, si dhe nevojën për integrim të shpejtë dhe efikas evropian të vendeve të Ballkanit Perëndimor.

„Austria, si një fqinj i afërt i rajonit dhe një njohës i shkëlqyer i rrethanave ballkanike, ndikohet drejtpërdrejt nga nevoja për integrim efikas evropian të vendeve të Ballkanit Perëndimor në Bashkimin Evropian. Stabiliteti, siguria dhe prosperiteti i vendeve të Ballkanit Perëndimor kanë ndikim të madh në sigurinë e të gjithë kontinentit”, tha ministrja Petrovska në takim.

Ministrja theksoi se vetë fakti që selia e OSBE-së është në Vjenë tregon përkushtimin e fortë të Austrisë ndaj multikulturalizmit. Petrovska falënderoi për mbështetjen e Austrisë në kuadër të kryesimit të Maqedonisë së Veriut me këtë organizatë në vitin 2023, e cila vjen në një situatë komplekse të sigurisë në kontinent.

Ministrja Taner përsëriti përkushtimin e Austrisë për të mbështetur rrugën e vendeve të rajonit, përfshirë Maqedoninë e Veriut, drejt anëtarësimit të plotë në Union dhe theksoi se vendi do të vazhdojë të jetë aktiv në arritjen e këtij qëllimi, si brenda BE-së ashtu edhe në rajon.

Në takim u bisedua edhe për bashkëpunimin dypalësh të mbrojtjes, i cili u tha se është veçanërisht intensiv. Ministret Petrovska dhe Taner shprehën gatishmëri për bashkëpunim edhe më të fortë, gjë që mund të shihet përmes Planit të Bashkëpunimit Dypalësh për vitin 2023, i cili mbulon disa fusha, duke përfshirë politikën e sigurisë, operacionet ndërkombëtare dhe trajnimin dhe arsimin ushtarak.

Si mënyrë për të forcuar bashkëpunimin u përmend edhe partneriteti me Gardën Kombëtare të Vermontit, i cili zbatohet nga të dyja vendet dhe që hap mundësinë për aktivitete shtesë të përbashkëta në mbrojtje, menaxhim krize, arsim dhe ekonomi.

Bashkëpunimi ushtarak ndërmjet Maqedonisë së Veriut dhe Austrisë zbatohet që nga viti 2006 dhe është veçanërisht aktiv në aspektin e hulumtimeve të politikave të sigurisë dhe ushtarake, shkëmbimit të përvojës në fushën e logjistikës, trajnimit dhe edukimit ushtarak dhe kurseve për operacione paqeruajtëse.