Mirëdita edhe nga unë.
Sa herë që lëshojmë në përdorim një objekt të tillë, unë ndihem veçanërisht i kënaqur dhe i lumtur, sepse në këtë mënyrë do ta përmirësojmë cilësinë e jetës për shumë njerëz, e natyrisht më së shumti për më të vegjlit, për fëmijët. Në fakt, qëllimi i këtyre objekteve është pikërisht për ta, që të fillojnë të krijojnë miqësi që në moshë të hershme, të fitojnë njohuri, miqësi dhe të formohen si personalitete.
Gjashtë deri në shtatë vitet e para të jetës janë gjithmonë më të rëndësishmet dhe ato na shoqërojnë gjatë gjithë jetës. Vlerat që do të fitoni në 6-7 vitet e para, vlerat me të cilat do të krijoni miqësi dhe do të ndani me të tjerët, ka shumë gjasa që t’ju shoqërojnë deri në fund të jetës suaj.
Prandaj, para së gjithash, dëshiroj t’u uroj atyre shumë miqësi të reja dhe shumë dije, të cilat më vonë në jetë do të kenë një rëndësi të madhe për ta.
Njëkohësisht, dëshiroj të theksoj edhe përmirësimin e cilësisë së jetës së prindërve, të cilët tani, duke i pasur këto objekte në dispozicion, do ta dinë se fëmijët e tyre janë në duar të sigurta. Se janë në duar të sigurta te edukatorët, te ata që do të kujdesen për edukimin dhe për jetët
e tyre, dhe në këtë mënyrë prindërit do të mund t’u përkushtohen më lehtë detyrimeve të tyre profesionale dhe zhvillimit të tyre në aspektin profesional si individë.
Në fund, dëshiroj t’i shpreh mirënjohjen time kryetarit të Komunës së Gazi Babës, deputetëve që vijnë nga rajoni i Komunës së Gazi Babës, këshilltarëve dhe administratës, të cilët mbështesin realizimin e objekteve të tilla, sepse këto janë me të vërtetë objekte me rëndësi kapitale, ndërtojmë autostrada, ndërtojmë bulevarde, ndërtojmë kopshte për fëmijë, ndërtojmë shkolla dhe ndërtojmë fusha sportive.
Të gjitha këto janë investime kapitale, të cilat, për fat të keq, me dekada nuk janë ndërtuar ose, për të qenë edhe më i drejtpërdrejtë dhe më i saktë, për fat të keq, shumë herë në të kaluarën janë vjedhur.
Njëkohësisht, e falënderoj edhe ministrin e Politikës Sociale, Demografisë dhe Rinisë, si dhe zëvendësministrin, për mbështetjen e përgjithshme që japin në realizimin e objekteve të tilla, mbështetja institucionale në nivel qendror është jashtëzakonisht e rëndësishme dhe me vlerë, prandaj mirënjohja dhe respekti im i madh, si ekip, u takojnë të gjithë pjesëmarrësve në realizimin e këtyre projekteve. Në fund, falënderoj edhe banorët, të cilët treguan durim gjatë gjithë kësaj periudhe.
Shpresoj që shumë shpejt të gjelbërohet edhe rregullimi i jashtëm përreth objektit dhe që ai ta marrë vërtet shkëlqimin dhe pamjen e tij të plotë, ashtu siç e kemi imagjinuar.
I falënderoj gjithashtu edukatorët, drejtoreshën dhe të gjithë ata që do të kujdesen për arsimin dhe edukimin e më të vegjëlve që vijnë nga ky vendbanim.
Ju faleminderit.
