I nderuar Kryetar i Kuvendit, z. Afrim Gashi,
I nderuar Kryeministër i Republikës së Kosovës, z. Albin Kurti,
Të nderuar zëvendëskryeministra të Qeverisë së Maqedonisë,
Të nderuar kolegë nga Qeveria,
Të nderuar përfaqësues të institucioneve financiare evropiane,
Të nderuar përfaqësues të Kuvendit të Maqedonisë, deputetë, kryetarë komunash,
Të dashur mysafirë,
Të nderuar përfaqësues të mediave,
Mirë se erdhët në një projekt që për të gjithë ne është historik — projekt që në kuptimin e plotë të fjalës është historik, i cili gjatë më shumë se dy dekadave të kaluara na ishte paraqitur se vetëm sa nuk kishte filluar të realizohej. Por ja, sot të gjithë jemi këtu dëshmitarë të fillimit të realizimit të këtij projekti, diçka që kjo Qeveri e kishte si prioritet të vetin para rreth 25–26 muajsh kur u zgjodh në Kuvendin e Maqedonisë.
Do të doja ta shfrytëzoj këtë rast, edhe pse pata një fjalim formal, të them tre gjëra të cilat mendoj se deri tani nuk u përmendën. Nuk do të doja të përsërisem me folësit e mëparshëm rreth gjatësisë së kësaj autostrade, kostos së tij, nga ku janë burimet financiare, cilat janë institucionet që e lëvizin këtë projekt etj. Të gjitha këto krijuan një projekt që për ne do të jetë me rëndësi të veçantë. Flas për dy shtetet tona, Republikën e Kosovës dhe Maqedoninë — për qytetarët e të dyja vendeve kjo do të thotë ekonomi më e mirë, ndërlidhje më e mirë, transport më i mirë, shkëmbim më i mirë, diçka që paraqet një atribut jashtëzakonisht të rëndësishëm, veçanërisht në shekullin XXI dhe në korrelacion me prioritetet tona strategjike si Qeveri. Për ato prioritete strategjike foli edhe zëvendëskryeministri Nikollovski: pasi jemi një vend pa dalje në det, si shtet të jemi kryqëzim i dy korridoreve shumë të rëndësishme paneuropiane, që janë Korridori 8 dhe Korridori 10.
Mesazhi im i parë që sot dua të përcjell është se pas pak më shumë se 20 vitesh ky projekt po bëhet realitet. Realitet i Qeverisë së udhëhequr nga VMRO-DPMNE, VLEN dhe ZNAM, një premtim që u dha në fillim të kësaj Qeverie, ishte pjesë e prioriteteve kryesore të punës së kësaj Qeverie dhe pres që shumë shpejt nga sot të shohim progres të ndjeshëm të punimeve në terren dhe, kuptohet, në kohë rekorde ky projekt të realizohet. Po ashtu, në kuadër të këtij mesazhi të parë, do të dëshiroja të shpreh kënaqësinë time që një kompani nga Maqedonia do t'i kryejë punimet ndërtimore në këtë projekt. Kjo do të thotë se do të kemi vlerë të shtuar shtesë në ekonominë e vendit, më shumë vende pune për qytetarët tanë — diçka që paraqet një nga prioritetet kryesore të kësaj Qeverie.
Puna e dytë dhe mesazhi të cilin gjithashtu dua sot ta dërgoj është se sot këtu nuk do të ndalemi. Shumë shpejt nga sot vazhdojmë me edhe një segment tjetër autostrade e cila është pjesë e Korridorit 8. Shpresoj shumë shpejt nga sot të mund të marrim pjesë në një ngjarje të tillë e cila do ta lidhë vendin Bukojçan me autostradën të cilën pres në fillim të vitit të ardhshëm ta lëshojmë, e ajo është Kërçovë – Ohër, përkatësisht nga Bukojçani deri në Kërçovë. Me këtë në një moment do të krijohen kushte në territorin e shtetit të ndërtohen 6 pjesë autostrade, diçka që deri tani kurrë në të kaluarën nuk ka ndodhur. Ato janë pjesa nga Bllacë deri në Shkup, pjesa Tetovë – Gostivar, nga Gostivar deri në Bukojçani, nga Bukojçani deri në Kërçovë, nga Kërçovë deri në Ohër dhe nga Prilep deri në Manastir, diçka që me të vërtetë paraqet moment historik për ne qytetarët, por edhe për shtetin në përgjithësi.
Mesazhi i tretë që dua të përcjell sot, dhe për të cilin mendoj se është shumë i rëndësishëm, është se kur ndërtoni një rrugë, kur ndërtoni një autostradë — ju ndërtoni të ardhmen. Ne sot po fillojmë të ndërtojmë të ardhmen, një të ardhme për të rinjtë tanë.
Sepse në politikë, politikanët janë të përkohshëm. Ata vlerësohen për atë që lënë pas vetes dhe për veprat që mbeten pas tyre. Ne, si politikanë në këtë Qeveri të Maqedonisë, besoj se do të lëmë pas projekte kapitale, vepra kapitale që do të përcaktojnë të ardhmen e shtetit dhe do të sigurojnë një të ardhme për të rinjtë. Në vend që të rinjtë ta ndërtojnë të ardhmen dhe familjet e tyre jashtë atdheut të tyre, kjo do të jetë një motiv më shumë që ata të qëndrojnë këtu, në shtëpinë e tyre. Ndërsa ata që janë larguar, do të mundohemi që t’i kthejmë këtu, në vendin e tyre, dhe së bashku, nga këtu, të luftojmë për atdheun tonë të përbashkët.
U shpreh mirënjohjen time të gjithë atyre që ishin të përfshirë në realizimin e këtij projekti. Falënderoj secilin që la një pjesë të jetës së tij dhe ia kushtoi realizimit të këtij projekti, si dhe secilin që do të vazhdojë t’ia kushtojë kohën dhe përkushtimin e tij këtij projekti në muajt dhe vitet e ardhshme. Nga ana ime, e keni mbështetjen time të plotë dhe, si Qeveri, ne do të vazhdojmë të jemi të përqendruar te ekonomia dhe rimëkëmbja ekonomike e shtetit. Sepse patriotizmi në shekullin XXI është diçka shumë më tepër sesa idetë nacional-romantike. Ai përfaqëson një ekonomi të fortë, standard të mirë jetese dhe qytetarë të kënaqur me institucionet dhe Qeverinë, luftën kundër krimit dhe korrupsionit, si dhe sundimin e së drejtës. Këto janë prioritetet kryesore të kësaj Qeverie të Maqedonisë.
