Mickoski nga Çeshinova-Oblesheva: Zhvillimi i çdo komune nënkupton një të ardhme më të mirë për qytetarët

Mirëdita edhe nga unë.

Për mua është vërtet kënaqësi kur mund të jem pjesë e projekteve të mira që realizohen dhe zhvillohen edhe në komuna me numër më të vogël banorësh, siç është Komuna e Çeshinovës-Obleshevës. E përgëzoj kryetarin e komunës për punën e përkushtuar. Dhe, natyrisht, së bashku, me mbështetjen e Qeverisë, në periudhën që vijon do të realizojmë edhe shumë projekte të tjera që janë prioritet për qytetarët e kësaj komune. Komunë e mrekullueshme, njerëz të mrekullueshëm. Tani, ndërsa shëtisnim përgjatë kësaj rruge të sapoasfaltuar, biseduam edhe për përparësitë në periudhën që vijon. Ai vetë në deklaratën e tij tha se po përgatit një pjesë të projekteve. Unë do ta inkurajoja, ja kështu publikisht, që t’i përgatisin projektet sa më shpejt, sepse vitin e ardhshëm, si Qeveri, planifikojmë një thirrje të re, me të cilën nga buxheti qendror do të financojmë projekte për vetëqeverisjen lokale, për komunat.

Diçka që do të jetë vazhdimësi e asaj që e filluam që nga momenti i parë kur u zgjodhëm si Qeveri. Kështu që edhe kjo do të jetë një vlerë e shtuar për cilësinë e jetës së qytetarëve në këtë komunë të mrekullueshme. Dhe gjithashtu, më në fund të zgjidhet, do të thosha, ajo çështje që mbetet e pazgjidhur, e kjo është furnizimi me ujë në një pjesë të madhe të vendbanimeve. Ne presim, dhe tashmë është e sigurt, që në agjendën e reformave të marrim një shtesë, mbi ato shtatëqind e pesëdhjetë milionë euro që i morëm më parë. E dini si është struktura atje: një e treta është likuiditet në buxhet, një e treta është grant përmes Kornizës së Investimeve për Ballkanin Perëndimor dhe e treta është kredi e lirë, e cila fillon të shlyhet nga viti 2035.

Presim të marrim një shumë të konsiderueshme në atë shtesë dhe një nga përparësitë dhe projektet do të jetë pikërisht ky për të cilin biseduam sot me kryetarin e komunës, ndërsa ndërkohë ai do të vazhdojë t’i zhvillojë projektet dhe, nëse duhet, do të ketë mbështetje shtesë edhe nga Qeveria qendrore. Kështu që ai projekt duhet të realizohet dhe do të realizohet. Ne do ta vendosim në listën indikative si një nga përparësitë e Qeverisë, sipas dinamikës që kemi nga Bashkimi Evropian. Miratimi përfundimtar i asaj liste duhet të ndodhë në gjysmën e parë të vitit të ardhshëm. Kështu që, edhe një herë, e përgëzoj kryetarin e komunës, ai po bën vërtet një punë të shkëlqyer.

E përgëzoj dhe dua t’i falënderoj këshilltarët që e mbështesin punën e kryetarit të komunës, t’i falënderoj deputetët që vijnë nga ky rajon, të cilët luftojnë për një projekt më shumë, ndërsa ne si Qeveri do të vazhdojmë edhe më tej të realizojmë atë që u nevojitet qytetarëve.

Dua t’ju falënderoj edhe juve, mediave, që jeni gjithmonë këtu kur promovojmë diçka që është vlerë e shtuar për cilësinë e jetës së qytetarëve.

Ju faleminderit.