Të nderuar përfaqësues të mediave,
Të dashur kolegë nga Qeveria,
I nderuar ambasador Rokas,
I nderuar Fatih,
Përfaqësues të Komisionit Evropian dhe të Bankës Evropiane për Rindërtim dhe Zhvillim,
I nderuar drejtor Trajanovski, punonjës të Ndërmarrjes Publike për Rrugët Shtetërore,
Të gjithë ju që jeni sot këtu me ne.
Kam nderin dhe kënaqësinë e madhe që sot mund të nisim një projekt i cili, mund të them, është paralajmëruar për dekada me radhë. Për mua, si Kryeministër, është një kënaqësi e madhe që së shpejti në të gjithë territorin e vendit do të zhvillohen 6 akse autostradash.
Përveç këtij, i cili duhet të lidhë kryeqytetin me kufirin me Kosovën, përkatësisht me Bllacën, janë edhe akset që do të lidhin Tetovën dhe Gostivarin, Gostivarin me Bukojçanin, po përfundojmë pjesën e autostradës Kërçovë–Ohër, më pas Prilep–Manastir, dhe së shpejti pres që të përfundojë edhe procedura që do të lidhë Bukojçanin me Kërçovën.
Së bashku me këtë autostradë, pres që të gjitha këto 6 akse autostradash të realizohen njëkohësisht. Kjo do të jetë një vlerë e shtuar e madhe për ekonominë maqedonase. Kjo është diçka që për mua ka rëndësi të jashtëzakonshme dhe përbën një nga prioritetet kryesore të kësaj Qeverie, që zhvillimi ekonomik të vazhdojë në të njëjtën mënyrë siç e kemi përcaktuar 2 vjet më parë, kur u zgjodhëm si qeveri.
Ndërtimtaria, si një nga shtytësit kryesorë të zhvillimit ekonomik në vitet që pasojnë, pres të vazhdojë me dinamikë të pandryshuar.
Në muajin prill kemi një shkallë jashtëzakonisht të lartë të realizimit të projekteve, një hov të madh të ndërtimtarisë. Të dhënat e fundit të Entit Shtetëror për Statistikë thonë se është për pothuajse një të tretën më mirë se vitin e kaluar për të njëjtin muaj. Këtu flas si për ndërtimin e ulët dhe të lartë, diçka që deri më tani është vërejtur në historinë e re të shtetit. Pres që në këtë drejtim të lëvizin gjërat edhe në periudhën që pason.
Por, më lejoni të them edhe diçka që qytetarët e dinë shumë mirë.
Kjo autostradë me vite ishte simbol i premtimeve të paplotësuara. Pothuajse çdo qeveri e paralajmëronte, secila para zgjedhjeve premtonte se do ta ndërtojë, ndërsa parti të caktuara politike me vite rrihnin gjoksin dhe thonin se pikërisht ato kujdesen më së shumti për këtë pjesë të shtetit.
Në fund, nga e gjithë kjo mbetën vetëm fjalë të zbrazëta, disa parcela të blera në trasenë e këtij aksi të kësaj autostrade nga persona të caktuar me prapavijë të dyshimtë dhe persona që lidhen me disa parti politike, gjithçka tjetër mbeti vetëm në premtime, për fat të keq.
Sot dallimi është i qartë dhe i dukshëm. Në vend të premtimeve të reja, kemi mjete të siguruara, marrëveshje të nënshkruara, kontraktor të zgjedhur dhe realizim të filluar. Dhe pres që, nëse gjithçka shkon siç duhet, me ndihmën e Zotit, këtë muaj ose muajin tjetër, Koce, të fillojmë tashmë me aktivitetet në terren t'i përfundojmë.
Kështu që, e di që si përfundim mbetet të zgjidhet mbikëqyrja, Aleksandër kështu më informove ti. Shpresoj që edhe nga banka do të jenë të shpejtë dhe ekspeditivë ashtu siç dinë ata vetë të jenë, dhe objektivë ashtu siç dinë të jenë. Dhe shpresoj që shumë shpejt do ta përfundojmë edhe këtë procedurë dhe do të mund të fillojmë me realizimin e këtij projekti.
Kjo Qeveri nuk ka qëllim të mbahet mend për arsyetime. Duam të mbahemi mend për projekte, për autostrada, rrugë eksprese, hekurudha, shkolla, spitale dhe investime që do të mbeten pas nesh. Kjo është përgjigjja jonë ndaj të gjithë atyre që me vite vetëm premtonin.
Vazhdojmë me punë, vazhdojmë me investime kapitale dhe vazhdojmë të ndërtojmë një shtet që do të lëvizë përpara.
