Mirëdita edhe nga unë.
Nuk kam çfarë të shtoj mbi atë që thanë kryetari i komunës dhe ministri. Do të doja vetëm ta shfrytëzoj këtë mundësi për ta falënderuar kryetarin e komunës për punën e përkushtuar, këshilltarët e Këshillit Komunal që e mbështesin punën e tij, administratën e Komunës së Kavadarit, si dhe deputetët që vijnë nga Komuna e Kavadarit, të cilët përpiqen që të sigurojmë sa më shumë projekte pikërisht për banorët e kësaj komune. I falënderoj për punën e tyre të përkushtuar ekipore, sepse vetëm në këtë mënyrë mund të realizojmë më shumë projekte dhe të bëjmë diçka për qytetarët, gjë që është qëllimi dhe detyra jonë kryesore si politikanë.
Dua ta falënderoj edhe ministrin e Sportit, si dhe kolegët e mi në Qeveri, me të cilët punojmë me përkushtim që projekti që e nisëm më shumë se dy vjet më parë, kur u zgjodhëm si Qeveri, për rialokimin e mjeteve nga buxheti qendror drejt komunave, të jetë po aq i suksesshëm sa është sot. Bëhet fjalë për më shumë se 1.200 projekte, mbi 1.200 kantierë ndërtimi në të gjithë territorin e shtetit, gjë që nuk mbahet mend në Maqedoninë e pavarur. Kështu që, suksesi matet me parametrat ekonomikë dhe ne planifikojmë që edhe në vitet që vijnë të vazhdojmë të funksionojmë në këtë mënyrë si Qeveri, sepse vlerësojmë se projektet e suksesshme duhet të vazhdojnë. Ne e kemi njohur faktin se këto projekte kanë sjellë vlerë të shtuar në cilësinë e jetës së qytetarëve.
Edhe një herë, qoftë me fat fillimi i ndërtimit të këtij objekti dhe, siç më tha kryetari i komunës, pas një viti të mblidhemi sërish këtu për ta lëshuar në përdorim.
