Minçev: Akademinë po e ndërtojmë sipas standardeve bashkëkohore evropiane, me fokus te dituria, kompetencat dhe zhvillimi i nëpunësve administrativë

Krijimi i një sistemi bashkëkohor për zhvillimin profesional të nëpunësve administrativë, zhvillimi i një gjenerate të re drejtuesish dhe krijimi i një institucioni të fuqishëm për trajnim dhe zhvillim të administratës ishin në fokus të vizitës së punës të ministrit të Administratës Publike, Goran Minçev, në Shkollën Kombëtare të Administratës Publike të Italisë – SNA.
Në takimin me kryetarin e Shkollës Kombëtare për Administratë Publike, prof. Gennaro Terracciano, ministri Minçev bisedoi për mundësitë konkrete për thellimin e bashkëpunimit ndërmjet dy institucioneve, veçanërisht në prag të themelimit të Akademisë për Përsosje Profesionale dhe Trajnim të Nëpunësve Administrativë në Maqedoni.
Shkolla Kombëtare e Administratës Publike e Italisë – SNA, është institucion i Presidencës së Këshillit të Ministrave të Italisë, me rol të rëndësishëm në rekrutimin dhe trajnimin e nëpunësve shtetërorë dhe drejtuesve, si dhe në hulumtimin dhe zhvillimin e kapaciteteve të administratës publike.
Në fokus të bisedës ishte krijimi i një kanali të drejtpërdrejtë institucional për bashkëpunim ndërmjet SNA-së dhe Akademisë së ardhshme për Përsosje Profesionale dhe Trajnim të Nëpunësve Administrativë.
“Për ne, Akademia nuk është vetëm një institucion i ri, por një qasje e re ndaj zhvillimit profesional të administratës. Po krijojmë një sistem në të cilin njohuritë, kompetencat dhe përsosja e vazhdueshme bëhen themel i administratës publike bashkëkohore. Pikërisht për këtë arsye, për ne është e rëndësishme të mësojmë nga përvojat e institucioneve si SNA, të cilat kanë përvojë shumëvjeçare në zhvillimin e kuadrit administrativ dhe drejtues”, theksoi ministri Minçev.
Ligji për Përsosje Profesionale dhe Trajnim të Nëpunësve Administrativë u miratua në vitin 2025 dhe paraqet bazë për themelimin e Akademisë si organ në përbërje të Ministrisë së Administratës Publike, e cila do të fillojë punën në janar të vitit 2027.
Akademia do të krijojë një sistem në të cilin trajnimet do të planifikohen në bazë të nevojave reale të institucioneve, nëpunësit e sapopunësuar do t’i nënshtrohen trajnimit fillestar dhe provimit të detyrueshëm, ndërsa kuadri drejtues do të ketë detyrimin për përsosje profesionale pas avancimit. Sistemi parasheh edhe status të rregulluar të trajnuesve, bazë të të dhënave të trajnuesve, vlerësimin e programeve dhe të trajnuesve, si dhe veprimtari hulumtuese dhe analitike.
“Me këtë po krijojmë një mekanizëm institucional që deri më tani mungonte – që zhvillimi profesional i nëpunësve administrativë të planifikohet, zbatohet dhe matet në mënyrë sistematike. Nuk duam që trajnimet të jenë vetëm përmbushje formale e një detyrimi. Duam që ato të krijojnë njohuri dhe kompetenca që do të përkthehen drejtpërdrejt në punë më të mirë të institucioneve dhe shërbime më të mira për qytetarët”, theksoi Minçev.
Ministri Minçev prezantoi edhe mënyrën e re të emërimit dhe caktimit të drejtuesve të lartë në sektorin publik, të përcaktuar me Ligjin për Drejtuesit e Lartë, të miratuar së fundmi, dhe shprehu interes për shkëmbimin e përvojave me SNA-në lidhur me përcaktimin e kompetencave drejtuese dhe planifikimin e programeve të trajnimit për drejtuesit.
Në takim u shqyrtuan edhe mundësitë konkrete për bashkëpunim përmes shkëmbimit të programeve dhe metodologjive të specializuara, trajnuesve dhe ekspertëve, vizitave studimore, hulumtimeve të përbashkëta dhe shkëmbimit të përvojave në fushën e zhvillimit të drejtuesve të lartë.