Konferencën ministrore në Budva, e mbajtur në kuadër të Procesit të Berlinit, ministri Minçev e përmbylli me një sërë takimesh të rëndësishme bilaterale me kolegët e tij dhe përfaqësues të lartë nga rajoni dhe nga Bashkimi Evropian, me qëllim thellimin e bashkëpunimit dhe shkëmbimin e përvojave në fushat kyçe të reformave.
Në fokus të bisedimeve ishin reformat në administratën publike, të cilat ministri Minçev i theksoi si një parakusht thelbësor për përparimin e shtetit drejt Bashkimit Evropian. Ai theksoi se bëhet fjalë për një proces që shkon përtej përshtatjeve administrative, pra për një transformim të thellë të institucioneve në një shërbim efikas për qytetarët.
Në takimin bilateral me ministrin nga Kosova, Lulëzon Jagxhiu, u hap diskutim për zgjidhje konkrete dhe praktika që tashmë japin rezultate, me ç’rast ministri Minçev theksoi rëndësinë e bashkëpunimit rajonal dhe të mësimit të ndërsjellë. Ai shprehu kënaqësinë që proceset reformuese në Maqedoni gjithnjë e më shumë po njihen si një shembull pozitiv në rajon.
Në bisedimet me sekretarin e përgjithshëm në Ministrinë e Administratës Publike të Republikës së Greqisë, Janis Fustanakis, u shqyrtuan mundësitë për zhvillimin dhe avancimin e Akademisë së Administratës Publike, si dhe për vendosjen e një bashkëpunimi më intensiv me Qendrën e tyre Kombëtare për Administratë Publike.
Gjithashtu, në takimin me Francesco Leone, këshilltar i ministrit për administratë publike të Italisë, fokusi ishte në forcimin e kapaciteteve të nëpunësve administrativë dhe thellimin e bashkëpunimit përmes programeve të Shkollës Kombëtare të Administratës Publike të Italisë.
Me këto aktivitete, ministri Minçev edhe një herë konfirmoi pozicionin e Maqedonisë si një partner aktiv dhe i besueshëm në proceset rajonale dhe evropiane.
