Zëvendëskryeministri i parë dhe Ministri për Çështje Evropiane, Bekim Sali, u takua me Ambasadorin e Mbretërisë së Suedisë në Republikën e Maqedonisë së Veriut, Ola Sohlström.
Gjatë takimit u riafirmua partneriteti i shkëlqyer ndërmjet dy vendeve, si dhe mbështetja e vazhdueshme e Suedisë për rrugëtimin evropian të Maqedonisë së Veriut. U theksua gjithashtu rëndësia e ruajtjes së momentumit pozitiv në politikën e zgjerimit të Bashkimit Evropian.
Ministri Sali nënvizoi se integrimi evropian mbetet një nga prioritetet kyçe të Qeverisë, me fokus të veçantë në zbatimin e reformave në fushat themelore, veçanërisht në forcimin e shtetit të së drejtës dhe modernizimin e administratës publike.
Bashkëbiseduesit diskutuan mbi procesin e aderimit në BE, zhvillimet e fundit lidhur me Agjendën e Reformave dhe Planin e Rritjes për Ballkanin Perëndimor, si dhe rëndësinë e bashkëpunimit rajonal si shtyllë e progresit drejt Tregut të Përbashkët Rajonal dhe integrimit gradual në Tregun e Vetëm të BE-së.
U theksua kontributi i rëndësishëm i Suedisë në Ballkanin Perëndimor përmes bashkëpunimit reformues për periudhën 2021–2027, me fokus në demokraci, të drejtat e njeriut, shtetin e së drejtës, barazinë gjinore, zhvillimin e qëndrueshëm mjedisor dhe ekonomik, si dhe ndërtimin e shoqërive paqësore dhe gjithëpërfshirëse.
Në përfundim, Ministri Sali falënderoi Ambasadorin Sohlström për mbështetjen e vazhdueshme të Suedisë dhe shprehu gatishmërinë për thellimin e mëtejshëm të bashkëpunimit dypalësh dhe koordinimin në kuadër të perspektivës evropiane të vendit.
