Të dhënat më të fundit për muajin gusht tregojnë vazhdimin e stabilizimit të çmimeve dhe zhvillime pozitive në ekonominë maqedonase.
Norma vjetore e inflacionit në gusht të vitit 2026 është 2,6 për qind, ndërsa në të njëjtin muaj të vitit 2022 inflacioni ishte 16,8 për qind. Kjo tregon se sa ndjeshëm është ulur presioni inflacionist në krahasim me periudhën kur qytetarët dhe ekonomia përballeshin me rritje të madhe të çmimeve.
Veçanërisht i rëndësishëm është krahasimi me ekonomitë evropiane. Sipas të dhënave të publikuara deri tani nga Eurostati, inflacioni në eurozonë në gusht vlerësohet në 3,3 për qind, kundrejt 2,6 për qind në Maqedoni. Në korrik, inflacioni në eurozonë ishte 2,9 për qind, ndërsa në Maqedoni ishte 2,3 për qind. Kjo do të thotë se për të dytin muaj radhazi Maqedonia ka normë më të ulët të inflacionit se eurozona.
Nga të dhënat e publikuara deri tani nga Eurostati për muajin gusht, normë më të ulët se 2,6 për qind kanë Finlanda me 2,4 për qind, Malta me 1,9 për qind dhe Estonia me 1,3 për qind. Ndërkohë, inflacion më të lartë kanë një numër i madh ekonomish evropiane, ndër të cilat Bullgaria me 5,1 për qind, Spanja me 4,5 për qind, Belgjika me 4,2 për qind, Kroacia me 3,7 për qind, Greqia me 3,7 për qind, Sllovenia me 3,4 për qind, Italia me 3,2 për qind dhe Gjermania me 2,9 për qind.
Këto të dhëna janë veçanërisht të rëndësishme duke pasur parasysh se presionet inflacioniste në Evropë po forcohen sërish. Inflacioni në eurozonë u rrit nga 2,9 për qind në korrik në 3,3 për qind të vlerësuar në gusht, ndërsa komponenti energjetik shënon rritje vjetore prej 14,3 për qind.
Maqedonia, në kushtet e rritjes së sërishme të presioneve të jashtme mbi çmimet, arrin ta mbajë inflacionin në një nivel relativisht të ulët.
Ky është një tjetër tregues pozitiv ekonomik në fillim të shtatorit. Prodhimi industrial në korrik shënon rritje prej 1,3 për qind në nivel vjetor, ndërsa në shtatë muajt e parë të vitit është rritur për 0,9 për qind.
Treguesit e fundit ekonomikë duhet të shihen si një tërësi – rritja e prodhimit industrial, rritja e ekonomisë dhe stabilizimi i inflacionit në një nivel më të ulët se eurozona.
Qeveria mbetet plotësisht e përkushtuar ndaj politikave që do të sigurojnë stabilitet të çmimeve, mbrojtje të standardit të jetesës, paga dhe pensione më të larta, investime të reja dhe rritje të përshpejtuar ekonomike.
Nga inflacioni prej 16,8 për qind në gusht të vitit 2022 në 2,6 për qind në gusht të vitit 2026. Nga goditjet e çmimeve drejt stabilizimit. Nga pasiguria ekonomike drejt rritjes dhe parashikueshmërisë më të madhe.
Ekonomia maqedonase po stabilizohet, ndërsa treguesit pozitivë nga fillimi i shtatorit japin bazë që ky trend të vazhdojë.