Mickoski nga Ohri: Është lëshuar në përdorim aeroporti i rikonstruktuar “Shën Apostull Pali”   

“Mirëdita edhe nga unë. Së pari, dua të falënderoj për praninë kolegët nga Qeveria, krerët e komunave, deputetët e Kuvendit maqedonas, përfaqësuesit e komunave që janë në afërsi të aeroportit të Ohrit, të falënderoj udhëheqësinë e TAV aeroporteve, e cila është pjesë e grupit francez “Aeroports de Paris”, si dhe përfaqësuesit e mediave, të cilët gjithashtu na kanë ndjekur vazhdimisht gjatë periudhës që lamë pas dhe që, përmes raportimit të tyre, gjithçka që bëjmë e afrojnë më afër qytetarëve. 
 
Mund të them se ajo që shohim sot këtu në Ohër paraqet një hap të rëndësishëm përpara në drejtim të përmirësimit të cilësisë së shërbimeve që ofrojnë aeroportet në Maqedoni, me këtë, aeroporti i Ohrit vërtet fiton një dinamikë tjetër, një pamje tjetër, një cilësi tjetër dhe jam i bindur se në periudhën që vijon do të rritet numri i udhëtarëve, por edhe numri i kompanive që do t’i përdorin shërbimet e aeroportit të Ohrit, ndërsa ne si Qeveri do të vazhdojmë ta mbështesim këtë aktivitet me mbështetjen që kemi dhënë edhe deri tani. 
 
Në periudhën që vijon do të shohim që ta rrisim edhe më shumë këtë mbështetje, sepse aeroporti i Ohrit është një hallkë e rëndësishme, para së gjithash për zhvillimin e të gjithë rajonit, për zhvillimin e Maqedonisë si shtet, por njëkohësisht edhe për zhvillimin e Ohrit, Strugës dhe komunave të tjera që ndodhen pranë këtij aeroporti, më shumë turistë, më shumë potencial turistik, sepse në këtë mënyrë ne praktikisht zhvillojmë edhe ekonominë maqedonase. 
 
Nga ajo që munda të mësoj nga përfaqësuesit e TAV aeroporteve, të cilët vërtet impresionijnë me punën e tyre në Maqedoni gjatë viteve të fundit, është fakti se këtë vit po shënohen rekorde në aeroportin e Ohrit “Shën Apostull Pali”. Kemi një ditë kur praktikisht kemi pasur numrin më të madh të udhëtarëve deri tani në histori, më shumë se 3 mijë në një ditë. Gjithashtu, kemi edhe një ditë me më shumë se 20 fluturime, që gjithashtu paraqet një shifër të rëndësishme, një shifër për t’u vlerësuar. 
 
Jam i bindur se në periudhën që vjen, me këto aktivitete ndërtimore dhe me mbështetjen që japim si Qeveri, këto shifra do të dyfishohen, do të trefishohen dhe do të arrijmë në shifra të reja që përfaqësojnë targetin tonë të ri, sepse në pjesën joformale para këtij aktiviteti, kur biseduam, konstatuam se targetet që ishin vendosur para pak më pak se 20 vitesh janë arritur dhe tejkaluar prej kohësh, tani po përballemi me targete të reja dhe jam i bindur se këto targete të reja do të jenë pjesë e agjendës së koncesionerit. Por, gjithashtu, do të jenë pjesë edhe e agjendës së Qeverisë së Maqedonisë, ndërsa ne do të vazhdojmë edhe më tej të investojmë në infrastrukturë dhe ta bëjmë Maqedoninë atë që për ne paraqet synim, që është të jetë një kryqëzim në rajon, që paraqet një përparësi të rëndësishme strategjike dhe krahasuese në raport me vendet e tjera të rajonit. 
 
E di se ende kemi shumë probleme për t’i zgjidhur, e di se nuk jetohet ende ashtu siç dëshirojmë të jetohet, por gjithashtu jam i bindur se, me të gjitha këto investime që bën Qeveria e Maqedonisë, me të gjitha këto aktivitete që ndërmarrim si Qeveri, sot Maqedonia është një vend shumë më i mirë për të jetuar sesa ishte para tre vitesh. 
 
Dhe jam i bindur se pas tre vitesh nga sot Maqedonia do të jetë një vend edhe më i mirë për të jetuar, krahasuar me sot. Ku e bazoj këtë bindje timen? E bazoj në faktin se jemi të motivuar si kurrë më parë, ndërsa mbështetja që marrim nga qytetarët na frymëzon si kurrë më parë që të vazhdojmë të punojmë dhe të realizojmë atë që qytetarët presin nga ne. 
 
Edhe një herë do të doja t’i falënderoja të gjithë të pranishmit për mbështetjen që japin për realizimin e të gjitha këtyre projekteve. Edhe një herë dua ta falënderoj koncesionerin TAV aeroporte, e cila është pjesë e grupit francez “Aeroports de Paris” dhe të uroj që së bashku të realizojmë edhe shumë projekte të tjera në aeroportet maqedonase, si në Shkup, ashtu edhe këtu në Ohër. 
 
Edhe shumë vite bashkëpunimi të suksesshme. Dua të falënderoj gjithashtu mediat që vazhdimisht e ndjekin punën e Qeverisë dhe i informojnë objektivisht qytetarët për atë që bën Qeveria e Maqedonisë dhe në fund, do të doja ta uroj Ditën e Pavarësisë. 
 
Urime festa dhe na qoftë e përjetshme Maqedonia. 
 
Ju faleminderit.”