Министерот за образование и наука Панче Кралев денеска е во еднодневна работна посета на Анкара, Република Турција на покана на турскиот колега Омер Динчер.

Како што соопшти Министерството за образование и наука, двајцата министри разговарале за продлабочување на соработката во областа на образованието и науката истакнувајќи ја желбата за зајакнување на пријателството меѓу двете држави и народи преку зголемена соработка во областа на образованието.

Кралев на средбата со министерот за национално образование на Република Турција бил потпишан Протокол за соработка во областа на образованието.

- Со Протоколот ќе се поттикнуваат взаемни средби меѓу експерти, стручни соработници и други делегати, како и размена на информации, искуства и документација во повеќе области, меѓу кои општо, стручно и техничко образование, стажирање/обуки, уметничко образование, информатички и комуникациски технологии во образованието, проверка, евалуација и тестирање и специјализирано образование за надарени ученици и за ученици со пречки во развојот, стои во соопштението.

Министерства на двете земји, според соопштението, ќе ја обезбедат потребната поддршка за промоција на наставата на официјалните јазици на другата страна во нивните земји, вклучувајќи обезбедување на наставниците и наставни материјали. Со Протоколот ќе се стимулира воспоставување на врски на таканаречени „Сестрински училишта“ на ниво на основно и средно образование и ќе се поттикнува учество на учениците од основните и средните училишта во спортски натпревари, народни танци/ора, меѓународни кампови за млади и извидници.

Двајцата министри изразиле интерес за натамошно развивање на врски меѓу институциите надлежни за образование, верувајќи дека двете страни ќе имаат корист од проширувањето на меѓусебната соработка и размена во овие области, потенцирајќи дека ќе ги вложат сите напори за промовирање на поволни услови за соработка и размена на искуства.