Првиот заменик-претседател на Владата и министер за европски прашања, Беким Сали, учествуваше на седницата на Националниот совет за европска интеграција, каде ги претстави владините ставови за Извештајот на Европската комисија за владеење на правото за 2026 година и спроведувањето на Реформската агенда.
Во своето обраќање, Сали истакна дека членството во Европската Унија останува највисок стратешки приоритет на државата и дека реформите во владеењето на правото мора да бидат проследени со конкретни и мерливи резултати.
Тој нагласи дека Северна Македонија останува меѓу најуспешните земји во спроведувањето на Реформската агенда, потсетувајќи дека преку Планот за раст досега се обезбедени 142,1 милион евра, а неодамна е поднесено и четвртото барање за исплата, со реализирани 22 реформски чекори.
Сали упати повик до сите пратеници да дадат конструктивна поддршка на реформските закони, нагласувајќи дека политичките разлики не смеат да го попречат европскиот пат и придобивките што граѓаните ги очекуваат од реформите.