Министерства

167 деца меѓу кои 18 бебиња се идентификувани на неколку пофрекфентни крстосници во Скопје изминатите две недели од страна на 6 мобилни тимови. Најчестите активности во кои децата се вклучени, е улична работа, вклучително и продавање на мали предмети, чистење на стакла, и питачење. Поголемиот дел од нив се без документи и не се вклучени во образовниот процес.

Ова се дел од податоците коишто зајакнатите мобилни тимови за постапување со деца на улица на ЦСР Скопје денеска ги презентираа на работен состанок со министерката за труд и социјална политика Мила Царовска, претставникот на УНИЦЕФ Бенџамин Перкс и претставници од Црвен Крст на град Скопје.

„Единствен начин да ги детектираме и да почнеме да ги решаваме проблемите со кои се соочуваат децата на улица е да работиме одблизу со нив и нивните семејства, да им овозможиме континуирана помош и поддршка. Токму затоа, ги јакнеме мобилните тимови на Центарот за социјални работи кои веќе почнаа со мапирањето на најфрекфентните локации каде што има деца коишто питачат. Тие, исто така, ќе им помагаат на полнолетните да најдат работа и ќе ги насочуваат да се вклучат во мерките за доквалификација и прекфалификација кои ги нудиме”, изјави министерката Царовска.

Царовска уште еднаш потсети на важноста на социјалната реформа којашто се уште е во собраниска процедура. Со оваа реформа се извлекуваат најранливите од сиромаштија и истата значи за 20 пати поголем опфат на деца во користењето на детскиот и образовниот додаток и намалување на детската сиромаштија, но и овозможување безгрижно детство, детство кое е целосно ослободено од насилство, експлоатација и злоупотреба и вклучување на децата во образовниот процес.

„Првичните наоди од теренските истражувања потврдуваат дека децата на улица често се жртви на повеќе негативни искуства, вклучувајќи физичко и психичко малтретирање и занемарување. Тие ја зајакнуваат потребата од системски решенија, бидејќи многу од овие деца го пропуштаат правото на образование, здравје и заштита," рече Бенџамин Перкс, претставник на УНИЦЕФ. „Како луѓе, тешко е да се воздржиме од тоа да даваме пари или да купуваме производи од децата на улица. Но, треба да бидеме свесни дека ако го сториме тоа, овозможуваме средина што им штети на децата. На децата на улица им е потребна системска поддршка, прво и основно за да се спречи тие воопшто да завршат на улица".

Почнувајќи од следната недела, теренските работници ќе ги посетат домовите на децата што ги идентификувале на улиците и ќе почнат да работат со семејствата.

Проширувањето и зајакнувањето на мобилните тимови со стручен кадар е поддржано од УНИЦЕФ, а се спроведува преку ЦСР Скопје во соработка со Црвен Крст на град Скопје.

Изградбата на капиталните проекти се приоритет број еден за Владата. Најавивме дека оваа ќе биде економска година и се држиме до таквите изјави. Само преку ЈП за државни патишта во првиот квартал реализирани се преку 50 милиони евра во изградба и реконструкција на патната мрежа во земјава. Тоа е на пример за три пати повеќе инвестиции во споредба со првиот квартал од минатата година, истакна министерот за транспорт и врски Горан Сугарески кој заедно со директорот на ЈП за државни патишта, Зоран Китанов извршија увид во реконструкција на регионалниот пат Драчево - Орешани - Таор.

Министерот Сугарески потенцираше дека само во моментов се работи на преку 90 проекти и тоа патишта, мостови, патарини со вкупна должина од преку 700 километри патишта и вредност од над 850 милиони евра.

„Засилено работиме на гасификацијата, ја интензивиравме изградбата на железницата кон Бугарија и реално очекувам втор и трет квартал да имаме силен раст на капиталните инвестиции. Ни претстои долга градежна сезона, очекуваме се што најавивме за изградба и реконструкција во инфраструктурата да реализираме за оваа година, и уверен сум дека ни претстои силна економска година посветена на инфраструктурата”, изјави министерот за транспорт и врски Горан Сугарески.

Директорот на ЈП за државни патишта, Зоран Китанов истакна дека интензивно се работи на цела територија на државата. Реконструкцијата на овој пат е барање на жителите и целосната се очекува да заврши до крајот на мецец јули оваа година, потенцираше директорот Китанов. 

„Овој пат е само еден дел од патиштата што се работат низ државата. Ве уверувам дека не постои општина каде што во моментов не е отпочната рехабилитација или реконструкција на пат или мост. Тоа значи интензивна работа која во наредниот период се повеќе и се повеќе ќе се зголемува а ќе најголем бенефит ќе имаат граѓаните”, изјави Зоран Китанов, директор на ЈП за државни патишта.

На новинарско прашање во однос на изградба на пругата кон Бугарија, министерот Сугарески информираше дека се завршени 50 проценти од работите и дека за првата делница градежните работи сериозно се интензивирани, за втората делница се очекува до крај на годината да се избере изведувач и да почне изградбата, а за третата од Крива Паланка до бугарска граница, Министерството за финасии работи на обезбеудвање средства. Таму имаме 60 милиони грант средства од ИПА, потенцираше министерот Сугарески.

Во моментов се работи на преку триесетина патни правци, градежните акивности се засилени и очекувам дека во вториот и третиот квартал ќе имаме драстично зголемување на капиталните инвестиции, истакна министерот за транспорт и врски, Горан Сугарески при денешната посета во Злетово.

Тој заедно со директорот на ЈП за државни патишта, Зоран Китанов извршија увид во реконструкција на патниот правец Злетово-Пробиштип.

Министерот Сугарески потенцираше дека во овој период се реализира засилена градежна офанзива во изградба и реконструкција на патишта, изградба на железници како и изградба на гасоводот.

„Градежните работи на речиси сите капитални проекти ги засиливме како никогаш претходно. Најавивме силна економска година и таква ќе ја оствариме. Очекувам веќе овој квартал да го зголемиме процентот на реализација на капиталните инвестиции. Со силно темпо работиме на изградба и реконструкција на патната инфраструктура. Дополнително во моментов се работи и на проектирање на други патишта, ако се создадат услови и годинава, ЈПДП ќе распише тендери за реконструкција.

Интензивирани се и градежните работи на железницата кон Бугарија, a непрекинато се работи и на изградба на гасоводната мрежа. Генерално се работи интензивно, нѐ очекува долга градежна сезона така што сите планирани проекти очекуваме да ги реализираме”, изјави министерот за транспорт и врски, Горан Сугарески.

Директорот на ЈП за државни патишта, Зоран Китанов истакна дека интензивно се работи на започнатите патни правци во сите општини. Дополнително се очекува оваа година да се започне со реконструкција на други патни правци кои се планирани со програмата на ЈП за државни патишта.

„Денеска извршивме увид во реконструкција на регионалниот пат од Злетово до Пробиштип, еден од многуте патни правци кои ги работиме. Рехабилитираме 17 километри и веќе 30% од патот е завршен и очекувам за кратко време тој да биде готов. Важно е што жителите на Злетово после неколку децении ќе добијат нов пат. И не само тоа, овде во регионот се реконструираат и уште неколку патишта, на пример обиколница Кочани, потоа патот до Крупиште што значи еден преку 35 километри патна мрежа. Уште поважен е фактот што во секоја општина во државата се вршат реконструкции на минимум два до три патишта и со такво засилено темпо ќе продолжиме да работиме”, изјави Зоран Китанов, директор на ЈП за државни патишта.

Министерот за внатрешни работи Оливер Спасовски денеска во Центарот за обука во Идризово присуствуваше на промоцијата на отпочнувањето на твининг проектот „Усогласување на националните системи со ЕУ и шенгенските барања за гранично управување”,. Проектот финансиран од Европската Унија започна со реализација од почетокот на февруари годинава и ќе се спроведува во рок од 24 месеци, во рамки на националната ИПА програма за што се издвоени еден милион евра.

Негова основна цел е да придонесе за усогласување на националните системи со стандардите на ЕУ и Шенген во делот на интегрираното гранично управување, а во согласност со целите на националните и европските стратегии за пристапување.

Во своето поздравно обраќање министерот Спасовски рече: „Исполнувањето на европските стандарди во областа на поглавјето 24 претставува наша стратешка определба. Поглавјето 24 опфаќа повеќе области меѓу кои и областа - надворешни граници - која според мое мислење но и според искуствата на новите држави членки на ЕУ е една од приоритетните области. Свесни за ова Министерството за внатрешни работи во координација со соодветните институции на национално ниво во процесот на програмирање на ИПА 2016 и секако со поддршка на ЕК и Делегацијата на ЕУ го предложи овој проект и еве денес сме сведоци дека овој предлог и практично се реализира“.

Заблагодарувајќи се на континуираната помош и финансиската поддршка која што ЕУ ја дава на Република Северна Македонија, министерот Спасовски нагласи дека исполнувањето на т.н. шенгенски стандарди претставува сложен процес за кој ќе биде потребно долг период за негова реализација.

„Искуствата на државите кои последни се приклучија кон ЕУ и Шенгенскиот договор покажуваат дека активностите за етаблирање на соодветни стандарди и ресурси започнуваат повеќе години пред официјалното пристапување кон ЕУ. Целта на овој проект е понатамошно јакнење на капацитетите во делот на надворешните граници преку мапирање на мерките за прифаќање на Шенгенското законодавство, изменување и дополнување на законската рамка, како и јакнење на човечките капацитети преку спроведување на голем број обуки за институциите кои имаат надлежности во интегрираното гранично управување“, го заврши своето обраќање министерот Спасовски.

Агенцијата за финансиска поддршка во земјоделството и руралниот развој денеска на електронскиот систем за јавни набавки на Бирото за јавни набавки го објави тендерот за набавка на гориво за земјоделска механизација.

Оваа јавна набавка е согласно планот за јавни набавки на Платежната агенција и по Програмата за финансиска поддршка во земјоделството. Претходно, согласно процедурите, беше објавен техничкиот дијалог на којшто сите заинтересирани компании имаа можност да ја разгледаат тендерската документација и да дадат забелешки доколку имаат. Право на учество имаат сите странски и домашни правни или физички лица или група такви лица - понудувач кои се регистрирани за вршење на дејноста поврзана со предметот на договорот. За носител на набавката ќе биде избран оној економски оператор чија понуда претходно е оценета како прифатлива. Рангирањето на понудувачите ќе се врши според висината на понудените цени.

Со оваа јавна набавка Платежната агенција овозможува кофинансирање на 30 отсто од трошоците за набавка на гориво за земјоделска механизација. Согласно изработената методологија, висината на поддршката по корисник е утврдена во зависност од големината на површината и типот на земјоделски култури што ги  одгледуваат. Онаа компанија која што ќе го добие тендерот ќе треба да ги испечати платежните картици, потоа да ги достави до Платежната агенција којашто преку Подрачните единици ќе ги доделува на земјоделците. Платежните картици ќе бидат со определeн износ врз основа на големината на површините и земјоделските култури за кои конкурирале земјоделците за субвенции во 2018 година. Со утврдениот износ, земјоделците ќе можат да купат исклучиво „Еуродизел“ гориво за земјоделска механизација. Картичката ќе може да се користи повеќекратно се до исцрпување на нејзината вредност. 

Инаку, оваа мерка се воведува за прв пат на барање на земјоделците, за што во Програмата за директни плаќања се предвидени 200 милиони денари, а ќе бидат опфатени околу 55.000 земјоделци. Со оваа мерка, драстично ќе им се намалат производните трошоци на земјоделците, со што ќе имаат порентабилно производство и поголеми приходи а домашните земјоделски производи ќе станат поконкурентни на пазарот.

Во рамки на официјалната посета на Република Чешка, денеска министерот за земјоделство, шумарство и водостопанство, Љупчо Николовски и заменик министер, одговорен за ЕУ и меѓународна соработка на Република Чешка, Јири Шир, присуствуваа на Б2Б средбите помеѓу македонски и чешки компании од областа на млекопроизводството. Министерот Николовски во своето обраќање потенцираше дека овие средби претставуваат одлична можност за размена на информации  и искуства кои се потребни при донесување одлуки и се почеток на идна соработка. При тоа, Николовски ги презентираше мерките кои МЗШВ ги презема за развој на млечната индустрија, со посебен акцент на мерките од ИПАРД 2 програмата и Програмата за рурален развој. 

„Нашата посета на Република Чешка доаѓа во вистинско време, бидејќи развојот на сточарството, вклучително и на млекопроизводството, е од посебен интерес во креирањето на политиките на Владата на РСМ и на Министерството за земјоделство, шумарство и водостопанство. Индустријата за млеко и млечни производи е еден од најважните сегменти во агро-индустрискиот комплекс. Во годинешната Програма за рурален развој значително ја зголемивме финансиската поддршка за мерката за набавка на приплоден добиток и за оваа намена одвојуваме близу 1,5 милиони евра. Оваа мерка е важна за подобрување на генетскиот потенцијал, што крајно ќе влијае и врз квалитетот на финалниот производ, а предвидени се и други мерки со кои ќе се поддржи овој сектор. Секако на располагање се и мерките од ИПАРД 2 програмата, кои нудат можност за инвестиции во изградба или реконструкција на млекарници, фарми, набавка на опрема и друго“, посочи Николовски.

Токму мерката за набавка на приплоден добиток од Програмата за рурален развој, беше во фокусот на Б2Б, а целта беше да се идентификуваат можни добавувачи на стелни јуници од Чешка, со цел да се прошири понудата за македонските фармери за набавка на приплоден добиток и поефикасна искористеност на мерката. Во тој контекст, македонските и чешките компании разменија информации и контакти, и истите ќе им бидат презентирани на македонските фармери кои конкурираа на повикот.

На средбата присуствуваа шест македонски и десет чешки компании од млечната индустрија, кои што разменија искуства во областа на млечната индустрија, а разговараа и за можностите за заеднички настап на трети пазари. Чешка забележува значителен напредок во млечната индустрија поради што нејзините искуства се добредојдени за македонските компании од овој сектор. Во текот на денешниот ден, министерот Николовски присуствуваше и на отворањето на Националниот саем за сточарство што се одржува во Брно, Р. Чешка, на кој што компании од цел свет ги презентираат своите производи и достигнувања во областа на сточарството.

Денеска (12 мај 2019 година) министерот Никола Димитров се сретна со министерот за надворешни работи на Грција, Џорџ Катругалос кој во име на грчката Влада присуствуваше на инаугуративната церемонија на претседателот на Северна Македонија, Стево Пендаровски. 

За време на состанокот, соговорниците ја потврдија подготвеноста за продолжување на позитивната динамика во која се развиваат односите и соработката меѓу двете земји. Беше нагласено дека средбите на највисоко ниво (особено со посетата на премиерот на Грција, Алексис Ципрас на Скопје), ја одразуваат желбата за градење на односи темелени на заемна доверба и партнерство.

Се разговараше и за економската соработка, со посебен осврт врз инфраструктурното поврзување, со што се олеснува севкупната комуникација на граѓаните и стопанските субјекти, вклучувајќи ги двата нови договорени гранични премини.

Министерот Димитров уште еднаш се заблагодари за грчката поддршка за членството на нашата држава во НАТО и ЕУ. Тој го нагласи задоволството од темпото на ратификација на пристапниот протокол во земјите-членки на Алијансата и ги пренесе и очекувањата дека реформските и добрососедските постигнувања на Северна Македонија ќе добијат соодветно вреднување и од Европската унија: “Тоа ќе биде извонредно значајна порака до целиот регион: патот кон ЕУ е возможен и зависи од постигнати резултати.”

Министерот за земјоделство,шумарство и водостопанство, Љупчо Николовски, во рамки на официјалната посета на Република Чешка, имаше работан средба со министерот за земјоделство на Чешката Република Мирослав Томан. На средбата министерот Томан ја искажа подготвеноста на чешките институции да го пренесат целокупното искуство кое и е потребно на Република Северна Македонија за пристап во Европската унија од аспект на правила, постапки, процедури, легислатива и стандарди за квалитет и безбедност на храна, како неопходен предуслов во процесот на прилагодување.

Република Чешка како членка на ЕУ користи 1 милијарда евра средства наменети за модернизирање на земјоделството и подобрување на условите во руралните средини. Бенефитот за земјоделците од влезот во ЕУ е голем, но истовремено е неопходно да се достигнат стандардите за квалитет и безбедност на храната. Чешка е на врвот на ЕУ во одгледување на добиток и поседува најдобар генетски материјал, а инспекциските служби се едни од најстрогите во Европа. Во оваа насока, министерот Томан ја понуди нивната помош за пренесување на потребното знаење и искуството. Воедно, на средбата беа отворени голем број актуелни прашања, кои се приоритетни за реформа во шумарството, водостопанството и справувањето со климатските промени кои од година во година предизвикуваат сериозни штети врз земјоделското производство.

На средбата двајцата министри потпишаа Декларација за намера помеѓу Република Чешка и Република Северна Македонија. Со Декларацијата е предвидена взаемна соработка на двете држави во делот на трговската размена со земјоделско-прехранбени производи, размена на искуства во областа на здравјето на растенијата и фитосанитарна политика,шумарската политика, соработка во евро-интегративните процеси во земјоделските и руралните сектори, како и шумарството, рибарството и аквакултурата, лозарство, производство на вино, консолидација на земјоделско земјиште, осигурување и инструменти за финансиска поддршка во земјоделството и друго. Инаку, со Република Чешка за прв пат се потпишува документ за соработка во областа на земјоделството, што претставува позитивен импулс во унапредување на взаемната соработка.

Ова е прва средба на министри за земјоделство на двете земји по подолг период и беше оценета како многу успешна, бидејќи се дискутираше за конкретни теми и можности за соработка.
 

Во рамките на 58-та една од најзначајните меѓународни манифестации за визуелни уметности, Биеналето во Венеција, беше отворен и павилјонот на Северна Македонија со проектот Субверзија во црвено на уметницата Нада Прља во Палацо Рота Иванчиќ со перформативното уметничко дело „Црвена дискусија“. 
 
Учеството на Република Северна Македонија на годинашното Биенале го прогласија за отворено Мира Гаќина директор на Музејот на современата уметност (МСУ), кој оваа година е носител на нашиот настап, Јованка Попова куратор на изложбата, со пригодни поздравни говори на Никола Димитров, министер за надворешни работи на Република Северна Македонија и Роберт Алаѓозоски, национален координатор за култура.
 
Како одговор на темата „Да живеете во интересно време“, избрана од кураторот на годинашното Биенале Ралф Ругоф, проектот на Нада Прља „Субверзија во црвено“ поттикнува враќање кон „заборавените“ идеи за идеализмот и идеологијата, како вид на мотивација за современото општество. 
 
Проектот користи различни уметнички и не-уметнички методологии, вклучувајќи ја Црвената дискусија II, експериментален настан во живо со неколку современи мислители и куратори ангажирани во трансформативни практики, меѓу кои Чарлс Еше, Маурицио Лазарато, Влад Морариу (модератор), Шантал Муф, Лаура Раикович, Артан Садику, кои заеднички ќе се обидат да најдат излезни стратегии од сегашните услови на социјална несигурност и експлоатација, преку дефинирање на алтернативни услови за „интересното време“ во кое живееме. 
 
Изложбата ја вклучува и инсталацијата „Суптилна субверзија“, инсталација која редефинира серија на историско значајни уметнички дела од 1960-тите од колекцијата на МСУ Скопје, колекција заснована на концептот на Солидарност, како еден од клучните постулати на левичарската мисла и клучна аспирација на овој проект.

„Секоја жртва од минатото е света обврска во иднината. Денеска се собравме овде во паркот на општината Гази Баба, да изразиме должна почит и вечен спомен за трагично загинатиот наш колега, пријател, татко, сопруг, сограѓанин - Горан Стојменовиќ, припадник на Единицата за специјални задачи Тигар при Министерството за внатрешни работи, кој на 10-ти мај 2015 година прерано го загуби животот во полициската операција за неутрализирање на терористичката група во кумановската населба Диво насеље“.

Ова, на почетокот од своето денешно кусо обраќање, го истакна министерот за внатрешни работи, Оливер Спасовски по повод откривањето на споменикот посветен на припадникот на ЕСЗ Тигар, Горан Стојменовиќ, во паркот во општина Гази Баба, којшто загина во полициската акција во кумановско „Диво насеље“ на 10-ти мај 2015 година.
 
Министерот Спасовски нагласувајќи дека со својата херојска смрт како наш бранител, припадник на македонската полиција, Горан Стојменовиќ го заслужил своето место меѓу бесмртните, посочи дека - „Овој споменик посветен на незаборавот кон Горан не е никаква отплата на долгот кон него. Оти она со што тој, како и другите неговите колеги и соборци нѐ задолжиле се враќа само со дела, со хумани дела, со професионални дела, со благородни дела, со се она добро, чисто и честитот заради што тие воопшто и ги положија своите животи“.