До крајот на годинава во Македонија  ќе бидат пуштени во употреба седум нови детски градинки. Пет беа пуштени во употреба од почетокот на оваа година, така што досега вкупно се пуштени во употреба 46 нови детски градинки, информира денеска премиерот Никола Груевски.

Петте градинки пуштени во употреба годинава се во општините Кисела Вода, Чешиново-Облешево, Кавадарци, Босилово и Охрид, а планираните седум се во Карбинци, селото Оризари, Кочанско, Ѓорче Петров, Пештани, Охрид, Сарај, Липково и Гостивар. Исто така, во изминатиот период се отворени и 28 центри за ран детски развој. 

Премиерот додаде дека во 2006 година, пред да почнат активностите за изградба на градинки, опфатот на децата згрижени во овие установи изнесувал околу 10 проценти.

- Сега веќе тој опфат нарасна на приближно 40 проценти, поточно 38,5 проценти што за неколку години претставува значителен пораст. Тоа е во духот на поддршка на семејствата во Македонија кои имаат деца и во духот на поддршка на напорите за подобрување на демографските движења во Македонија, истакна премиерот Никола Груевски одговарајќи на новинарско прашање по поставувањето на камен-темелникот за изградба на нова спортска сала во Домот за деца без родители „11 Октомври“.