Универзитетската клиника за кардиологија, Институтот за белодробни заболувања кај децата - Козле и Универзитетската клиника за детски болести се првите три здравствени установи кои денеска добија едногодишни сертификати од Агенцијата за квалитет и акредитации на здравствени установи во Македонија.

Премиерот Емил Димитриев честитајќи им на првите три акредитирани здравствени установи упати порака дека здравјето на граѓаните и нивната здравствена заштита се врвен приоритет во сите владини програми и стратегии.

- Болниците и здравствените служби се витални компоненти на секое добро организирано и хумано општество и затоа здравствениот сектор е тој кој секогаш има приоритет при распределбата на ресурсите. Должност на Владата е да  ја поддржува и континуираната едукација за обезбедување квалитет на сите нивоа, рече меѓу другото Димитриев.

Вицепремиерот и министер за здравство Никола Тодоров потенцира дека во изминатиот период здравствнеиот систем во Македонија континуирано се развива, надградува, осовременува и со крупни чекори се движи кон достигнување европски и светски стандарди, со единствена цел да се обезбеди што е можно поквалитетни здравствени услуги за сите граѓани во државата. Тој најави дека треба да се акредитираат сите здравствени установи во државата, по што следува секоја година проверка на тоа дали се задржани условите кои ги исполниле.

На новинарско прашање што ќе значи акредитацијата за лекарите, а што за пациентите, Тодоров истакна дека стандардизирањето на квалитет значи дека во се се почитуваат определени протоколи за работа, со кои се намалува можноста за грешка, за интерхоспитални инфекции, а се зголемува ефикасноста и ефективноста на персоналот, во правец на намалување на болнички денови, а со тоа и порационално користење на буџетите од јавните здравствени установи.

- Идејата е со почитување на овие стандарди во континуитет да се овозможува развој и зголемување на ефиканоста на функционирањето на здравствените установи, изјави министерот Тодоров.