Четири од вкупно девет лаборатории на Бирото за метрологија се акредитирани од страна на Институтот за акредитација на Република Македонија. Акредитирани се лабораториите за маса, за притисок, за температура и за волумен и проток.

Според министерот за економија Ваљон Сарачини, под чија надлежност спаѓа и работата на Бирото за метрологија, со акредитирањето на четирите лаборатории ќе се надминат техничките бариери и слободниот проток на стоки и услуги.

- Со ова уште еднаш покажуваме дека ги следиме европските трендови во однос на метролошките институции. Бирото за метрологија ги исполнува и законските обврски кои се дел од нашата агенда кон исполнување на НПА програмата, изјави Сарачини при денешната посета на Бирото за метрологија, изразувајќи надеж дека во иднина и останатите лаборатори ќе добијат сертификат за акредитација.

Директорот на Бирото за метрологија Димитар Парнарџиев оцени дека добивањето на сертификатот за акредитација е од голема важност како за корисниците на услугите, така и за напредокот на индустријата.

- Со добивањето на овој сертификат за зголемува довербата од резултатите на мерењето што се направени во Бирото на национално ниво. Во индустријата и трговијата бенефитот е тоа што ќе добијат поквалитетен производ, а од аспект на секојдневниот живот ќе биде зголемена заштитата на потрошувачите, рече Парнарџиев.

Процесот на акредитација на лабораториите се одвиваше во четири фази: опремување на лабораторискиот центар, имплементација на документ менаџмент систем, дообука на персоналот и меѓулабораториски споредби со други престижни национални метролошки институти.