Република Македонија стана членка на Механизмот за цивилна заштита на Европската Унија.  За таа цел, минатата година беше склучен Меморандум за разбирање меѓу Дирекцијата за заштита и спасување на Република Македонија и надлежната служба за хуманитарна помош и цивилна заштита на Европската комисија, чија ратификациона постапка во Собранието на Република Македонија и во Европската комисија заврши на крајот на јануари оваа година.

Механизмот за цивилна заштита на ЕУ ја олеснува соработката при одговор на катастрофи меѓу 32 европски држави - ЕУ-27 и Хрватска, Македонија, Исланд, Лихтенштајн и Норвешка. Земјите – членки ги здружуваат ресурсите кои може да бидат достапни за погодени земји од катастрофа од целиот свет. Кога ќе се активира, механизмот го координира обезбедувањето помош и од внатре и надвор од Европската унија. Европската комисија управува со механизмот преку Центарот за мониторинг и  информирање.

Со приклучувањето кон Механизмот за цивилна заштита на ЕУ, Република Македонија се поврзува со мрежата низ Европа за справување со катастрофи и со тоа има пристап ресурси наменети за справување со широк спектар на катастрофи. Земјите-кандидати за ЕУ можат да станат членки на механизмот и пред да се приклучувањето во ЕУ. Хрватска учествува од септември 2009 година.

Членките на механизмот имаат корист преку размена на знаења, најдобри практики и проток на информации при реакција на големи итни случаи во Европа и пошироко. Со координација на Комисијата, тие взаемно си помагаат и помагаат на други земји. Република Македонија веќе има корист од оваа соработка во летото 2007 година, кога побара помош преку овој механизам за справување со шумските пожари.