Претседателот на Владата Зоран Заев денеска во својот кабинет го прими чешкиот амбасадор Н.Е Мирослав Томан, кој му честиташе за неговиот реизбор за премиер на Република Северна Македонија и му врачи официјално писмо-честитка од неговиот чешки колега, претседателот на Владата на Република Чешка, Андреј Бабиш.

На средбата беше оценето дека и во иднина ќе продолжи успешната соработка и поддршка која во континуитет ја дава Чешката Република, како во однос на остварувањето на стратешките приоритети, членство во НАТО и започнување на преговорите за членство во Европската Унија, на нашата држава и во насока на преземање соодветни мерки за совладување на економско-здравствената криза предизвикана од пандемијата на КОВИД-19.

Премиерот Заев изразувајќи задоволство и благодарност за поддршката која Чешка ја дава како членка на Вишеградската група (В4), која е една од најангажираните поддржувачи на земјите од Западниот Балкан за исполнување на аспирациите за добивање членство во Европската Унија и зголемениот ангажман на членките на НАТО Алијансата.

Беше истакната и поддршката која Северна Македонија ја добива од Чешката Република, со испраќање на полициски контингент кој учествува во заедничките операции за зголемен надзор на нашата јужна граница кај Гевгелија.

Премиерот Заев и Н.Е. амбасадорот Томан изразија подготвеност за продолжување на билатералните односи и зголемување на економската соработка, преку инвестиции во одделни сектори за поттикнување на растот на економиите во двете земји.