Предлозите на СДСМ, кои што предвидуваат зголемување на даноците се неприфатливи за Владата, изјави денеска во Гевгелија вицепремиерот и министер за финансии Зоран Страврески. 

- СДСМ предлагаше во насока на решавање на кризата да се зголемат даноците. Тоа го прават и 25 земји во Европа. Меѓутоа, ние го разгледавме тој предлог и сметаме дека зголемувањето на даноците можеби е најлесен начин да се префрли товарот на граѓаните и фирмите, но е најлош начин за решавање на проблемот на економската криза бидејќи ќе значеше дополнително оптоварување на фирмите и на граѓаните. Затоа ние го отфрливме тој предлог, рече Ставрески по посетата на фабриката „Ноел“, запрашан колку од 27-те мерки предложени од СДСМ се прифатливи.

Не сакаме, рече Ставрески, преку зголемување на даноците да го решаваме прашањето на буџетските приходи.

- Го стегнавме каишот, ќе штедиме во рамките на државната каса, ќе направиме ребаланс со цел да ги заштитиме најчувствителните категории, како што се пензионерите, социјалната помош, платите и субвенциите за земјоделството, а на сите останати категории ќе кратиме, но нема да зголемуваме даноци затоа што сметаме дека тоа не е добра мерка, посочи Ставрески.