Министерот за здравство Никола Тодоров денеска изјави дека има тенденција сето она што се прави во здравството да биде засенето со вештачко незадоволство меѓу лекарската фела, најчесто со пласирање дезинформации.

- Тоа е политичка тенденција и во рамки на политичка битка да се креира незадоволство. Ме загрижува тоа што доаѓа во време кога најверојатно отворив едно од најкрупните и најболни прашања во македонското здравство, кое напротив треба да биде на задоволство на сите чинители, односно на докторите и пациентите, изјави Тодоров, одговарајќи на новинарски прашања на свечениот собир по повод 7 април-Светскиот ден на здравјето.

Гледам тенденции во последните денови, нагласи министерот, да се вадат нови проблеми и да се потенцираат работи кои и во минатото биле проблем, но сега некако се препишуваат на мене, Министерството за здравство или Фондот. Сето тоа, како што рече, го гледа како обид за политичко дејствување.

- Обидот да се изгради погрешна перцепција за здравствениот систем е за да се спречи една битка која може да има тектонски пореметувања на начините на функционирање во минатото, додаде министерот за здравство Никола Тодоров.