Претседателот на Владата на Република Северна Македонија, Димитар Ковачевски, е во работна посета на Брисел, во рамки на која ќе учествува на Самитот Европска Унија-Западен Балкан.

Во состав на делегацијата која ја предводи премиерот Ковачевски е вицепремиерот за европски прашања, Бојан Маричиќ.

Домаќин на Самитот е претседателот на Европскиот Совет, Шарл Мишел. Покрај премиерот Ковачевски, на Самитот ќе учествуваат лидерите и шефови на Влади и држави на земјите од Западен Балкан, 27-те земји членки на ЕУ, претседателката на Европската комисија Урсула фон дер Лајен, претседателката на Европскиот парламент Роберта Мецола, еврокомесарот за проширување и добрососедство Оливер Вархеји, високи претставници на Светска Банка, Европска инвестициска банка (ЕИБ), Европска банка за обнова и развој (ЕБОР) и Советот за регионална соработка.

Согласно програмата, пред почетокот на Самитот Европска Унија-Западен Балкан, предвидено е премиерот Ковачевски во 16:30 часот да има изјава за медиумите, која може да ја проследите на следните линкови:

Изјава на премиерот Ковачевски пред почетокот на Самитот ЕУ-Западен Балкан

Deklaratë e Kryeministrit Kovaçevski para fillimit të Samitit BE- Ballkani Perëndimor

Doorstep statement of PM Kovachevski, EU-WB Summit

Премиерот Ковачевски ќе учествува во работните сесии на Самитот Европска Унија-Западен Балкан, каде во фокус на дискусиите ќе бидат геополитичката состојба, зајакнувањето на партнерството и соработката на земјите од Западен Балкан, забрзување на реформските процеси, како и усогласувањето на земјите од регионот со политиките и одлуките на ЕУ.

Во рамки на работната посета на Брисел, предвидено е премиерот Ковачевски, да одржи и билатерални состаноци.

Самитот Европска Унија-Западен Балкан има за цел да ги приближи кон ЕУ земјите од Западниот Балкан, подготвувајќи терен за нивно полноправно членство и овозможувајќи конкретни придобивки за граѓаните уште во текот на процесот на пристапните преговори.