Министерот за образование и наука Панче Кралев денеска во Штип најави реконструкција на училиштето во  населбата Македонка, за која тендерот ќе биде отворен на 17  април, а се очекува да трае преку летото и да заврши до почетокот на новата учебна година.

Тој денеска ги посети основните училишта во населбите Македонка и Три Чешми, заедно со градоначалникот на Штип Илчо Захариев, кој истакна дека меѓу образовните приоритети во градот е и изградба на спортски сали во основните училишта во населбите Баби и Три Чешми.

- Имавме и други приоритети, како што е решавањето со училиштето во населбата Ново Село и изградба на мала спортска сала за децата во оваа населба. На оваа средба разговаравме и за сместувањето, односно за нов објект за Факултетот за ликовна уметност, рече Захариев.

Кралев имаше средба и со ректорот на Универзитетот „Гоце Делчев“ Саша Митрев, на која биле разгледани и приоритетни инвестиции на таа високообразовна институција.  

Митрев соопшти дека во план е реконструкција на текстилното училиште, каде што ќе биде сместен Медицинскиот факултет на Штипскиот универзитет.  - Универзитетот распиша тендер и сметаме дека до крајот на годината овој објект ќе биде комплетно реновиран, рече Митрев.

На новинарски прашања министерот Кралев одгвоори дека МОН  се подготвува за екстерното оценување во мај и дека во текот на неделава се одвива пилот-екстерно оценување во некои училишта во Македонија.