Македонија излезе од двојна рецесија, економијата влезе во фаза на рано закрепнување и напредува и се предвидува раст од 1,4 отсто за годинава.

Ова е наведено во најновиот Извештај на Светска банка за земјите од регионот кој беше денеска презентиран.

На почеток се очекува растот да биде скромен, но постепено да забрзува во втората половина од годината со имплементање на планот за јавни и странски директни инвестиции, се вели во Извештајот. Според СБ, загрижува тоа што ова закрепнување нема да влијае на намалување на невработеноста која во некои земји од регионот се движи над 30 проценти, како и на сиромаштијата која е 32,2 проценти.  

СБ препорачува да се спроведуваат структурните реформи кои се однесуваат на деловното окружување и пазарот на труд. Се посочува дека Македонија е лидер во некои делови од бизнис окружувањето, како што дозволите за градба, регистрација на имот, даноци...

Главниот економист за регионот на Европа и Центална Азија во Светска Банка и коавтор на Извештајот Абебе Адуња, потенцира дека треба да се работи на решавање на прашањето со недостиг на одредени занимања, образованиот систем кој не произведуваа соодветни кадри, особено средното образование, да се олесни условите за да инвестираат оние што заминале од земјата. Ограничување според него е и високите придонеси на труд кој во просек во регионот се од 35 проценти.

Регионалниот директор на Светска банка во Македонија Татиана Проскурикова потенцира дека македонската Влада заедно со Светска банка работат на Стратегија за решавање на прашањето на невработеноста.

Во Извештајот се наведува дека за регионот се предвидува раст од 1,7 отсто. Извештајот се издава два пати во годината од економисти во регионот на Европа и Централна Азија во Светска банка, одделот за намалување на сиромаштијата и економско управување.