Повеќе значајни проекти се реализирани изминатиот период во Националната галерија на Македонија, чија основна дејност е колекционирањето, негувањето и презентацијата на ликовното творештво. Два проекта во делот на инвестиции во објектот Мала Станица се целосно завршени од страна на Националната галерија, а за годинава во делот на инвестициите ќе се реализираат уште два исклучително значајни проекти и тоа за Даут Пашин Амам и за Чифте Амам.

Националната галерија на Македонија годинава нуди програма, која вклучува голем број ретроспетивни изложби на наши истакнати уметници, ќе учествува со голем број проекти во културно-информативните центри во Софија и во Њујорк, а ќе се претстави и на Венециското биенале. 

За успешното функционирање на Националната галерија на Македонија задоволство изрази министерката за култура Елизабета Канческа - Милевска, која денеска ја посети таа национална установа.

- Изминатата година во објектот Мала станица беше извршена целосна реконструкција на системот за греење и ладење, нешто што беше неопходно за самиот простор, како и реконструкција на предната фасада на објектот со цел просторот кој е наменет за најразлични галериски перформанси и промоции да биде ставен во функција на уметниците, рече Канческа - Милевска.

Посочи дека во програмата за годинава во делот на инвестициите ќе се реализираат два исклучително значајни проекти - едниот за уредување на депото на галерискиот објект Даут Пашин Амам, а другиот е наменет за галерискиот објект Чифте амам.

- Во рамки на проектот за уредување на депоата во националните институции влезен е и Даут Пашин Амам каде Националната галерија ќе изврши целосно уредување на депоата, како и проектот наменет за галерискиот објект Чифте амам. За него е изработен основен проект од страна на Националната галерија кој опфаќа целосно спречување на влагата во објектот. Проектот е околу 17 милиони денари. Ќе се уреди и дворниот простор на Чифте Амам каде ќе биде поставена и ограда, истакна Канческа - Милевска.

Се осврна на реализираните бројни ретроспективни-монографски изложби, како и на соработката со други центри, како што е онаа во Чешкиот културен центар. Укажа на изложбата која минатата година се одржа во Чешка по повод одбележувањето 20 години дипломатски односи со Чешка, а ја нагласи и соработката со Словенија.

- Нешто што сакам да потенцирам, а е од исклучителна важност за Република Македонија, е во однос на Музејот на Лазар Личеновски. Целосно е завршена оставинската постапка во однос на куќата на Лазар Личеновски, државата додели два стана, она што се бараше од страна на сопствениците. Процедурата е целосно затворена, правосилно е решението, а  остануваат уште административните работи, рече Канческа - Милевска.

Националната галерија, потенцира, се подготвува околу уредувањето на Музејот на Лазар Личеновски, а идната година кога се одбележуваат 115 години од раѓањето на Лазар Личеновски, а тоа е април 2016 година планираме да се заврши целокупното уредување и да се отвори Музејот за посетителите. 

- Минатата година почнавме со откуп на ликовни дела како една стимулативна мерка. Се откупија околу 60 ликовни дела на 64 уметници. Планираме годинава да има изложба со цел јавноста да види што има откупено државата. Дел од откупените ликовни дела влегуваат во поставките на Националната галерија и на Музејот на современата дела, тука влегоа 16 ликовни дела и се планира заедничка изложба на двете институции, додаде Канческа - Милевска.

Директорот на Националната галерија на Македонија, Маја Брзанова Неделковска рече дека и годинава имаат обемна програмска активност и настојуваат да реализираат проекти кои се однесуваат на афирмација на македонската современа ликовна уметност на автори кои оставиле голем белег во нејзиниот развој како и на помладите генерации.

- Предвидени се две ретроспективни изложби на Томо Шијак и на Александар Кондев. Потоа имаме неколку истражувачки проекти кои ги опфаќаат авторите Борко Лазески, Вангел Наумовски, Спасе Куновски...кои ќе се одвиваат во неколку фази и крајно би било реализација на ретроспективни изложби проследени со соодветни публикации, истакна Брзанова Неделковска.

Меѓународната активност, посочи, опфаќа соработка од реципрочен карактер - Чешкиот културен центар годинава гостува кај нас со дела од современата чешка уметност.

- Ќе гостуваме во Загреб со еден проект на Ана Франговска, Маја Чанкуловска Михајловска и Горанчо Георгиев, а имаме три проекти во Културно-информативниот центар во Софија со Тома Мишев, Жанета Гелевска, Благоја Маневски и Јован Шумковски, а во Културно-информативниот центар во Њујорк со Ивана Пирковска и Александар Таневски итн., додаде Брзанова Неделковска.