Кирил Миновски е назначен за нов директор на Управата за јавни приходи. Тој доаѓа на местото на досегашниот директор Горан Трајковски, кој заминува на друга функција. 

Миновски е именуван за директор на УЈП на вчерашната владина седница, а доаѓа од позицијата директор на Државниот пазарен инспекторат. 

- Можам да потврдам дека на вчерашната владина седница Кирил Миновски е именуван за нов директор на УЈП. На досегашниот директор Горан Трајковски му истече мандатот и ние сме благодарни за неговиот ангажман, за придонесот кој тој го имаше во реализацијата на владината програма, реформите кои ги спроведе и резултатите на институцијата која ја раководеше. Планирано е соработката со господин Трајковски да продолжи на друга одговорна функција, изјави портпаролот на Владата, Александар Георгиев.

За нов в.д. директор на Државниот пазарен инспекторат е назначен Виктор Дерменџиев.

На вчерашната владина седница Мими Ѓоргоска Илиевска е именувана за директор на Агенцијата за филм, потврди за МИА Александар Ѓорѓиев, портпарол на Владата.

- Таа досега беше директор на Кинотеката на Македонија, има огромно искуство во областа, член на бордот на директори на Светската федерација на филмски архиви и е македонски претставник во Еуроимаж, вели Ѓорѓиев.

Ѓоргоска-Илиевска доаѓа на позицијата на досегашниот директор на Агенцијата за филм Дарко Башевски на кого му истече мандатот на оваа позиција.

- Башевски постигна позитивни резултати и придонесе во поддршката на македонската филмска кинематографија каде што во изминатиот период се подржаа поголем број домашни играни, кратки, анимирани и документарни филмови, додаде владиниот портпарол.

На испразнетата позиција во Кинотеката на Македонија, Министерството за култура треба да назначи нов директор.