Претседателот на Владата на Република Македонија денеска ја отпочна официјалната посета на Република Србија, во придружба на владина делегација во чиј состав се заменикот претседател на владата и министер за внатрешни работи, Оливер Спасовски, министерот за информатичко општество и јавна администрација, Дамјан Манчевски и државниот секретар во Министерството за надворешни работи Виктор Димовски.

По свечената церемонија на пречекот, Претседателката на Владата на Република Србија, Ана Брнабиќ и премиерот Заев се повлекоа на тет-а-тет средба.

Двете владини делегации, предводени од премиерите на Република Србија и Република Македонија потоа одржаа заедничка пленарна средба, на која се разговараше за теми од интерес на граѓаните на двете земји, како и за натамошното продлабочување на пријателските односи.

На пленарните разговори, премиерот Заев и премиерката Брнабиќ, и двете делегации разговараа за интензивирање на некои од заедничките постоечките проекти, како и за соработката на проектите на коридорот 10.

Премиерот Заев истакна дека сѐ уште има простор за продлабочување на економската соработка, особено во делот на инвестициите за кои информираше дека Владата на Република Македонија со новата економска програма нуди отворени можности на тој план. Двете делегации се согласија дека посебен интерес во оваа насока е поддршката на бизнис иницијативите во информатичките технологии, старт-ап компании, технолошките паркови и иновативни технологии.

Дигитализацијата е од интерес на двете земји, се согласија двете делегации, и Република Србија, како лидер во оваа област може да инспирира повеќе проекти за кои има интерес во Република Македонија, и кои, во голема мерка можат да олеснат соработката во повеќе сфери.

Соработката во дигитализацијата има потенцијал да ги олесни царинските формалности, роаминг комуникацијата и во голема мерка да ги олесни врските меѓу двете економии, бизниси и други проекти.

На пленарната средба меѓу двете делегации се разговараше за унапредувањето на заедниците на Србите и на Македонците во Република Македонија и Република Србија.

Двете делегации разговараа и за соработка во земјоделството со оглед на фактот дека двете земји имаат сериозни ресурси и потенцијали да бидат водечки земји во регионот, со заеднички проекти.

Претседателите на владите на Република Македонија и Република Србија ја афирмираа и идејата за заедничка седница меѓу двете влади и се договорија во таа насока да опточнат подготовки.

Претседателката на Владата на Република Србија се заблагодари за поддршката на Република Македонија за Србија во регионалните проекти и иницијативи.

На средбата се разговараше и за соработката меѓу двете министерствата за внатрешни работи во делот на заедничката контрола на границите во однос на мигрантските процеси, како и за други прашањаод инфраструктурно поврзување, односно за нови гранични премини за олеснување на секојдневието на граѓаните во граничните подрачја.