Претседателот на Владата на Република Северна Македонија, Зоран Заев работната посета на Кралството Белгија денеска ја заврши со средба со Генералниот Секретар на НАТО, Јенс Столтенберг во седиштето на Алијансата, во Брисел. На средбата присуствуваа и заменик на претседателот на Владата на Република Северна Македонија задолжен за европски прашања, Бујар Османи, заменичката на претседателот на Владата и министерка за одбрана, Радмила Шекеринска.
На средбата Премиерот Заев истакна дека Република Северна Македонија, во изминатиов период ја покажа својата посветеност и силна заложба во земјата, но и во целиот регион да се зголеми безбедноста и стабилноста. „Сите сте сведоци дека само за година и половина, со решавање на клучните предизвици за иднината на нашето општество и нашата земја, Владата успеа да ја врати земјата на вистинскиот пат, на патот на евро – атлантските интеграции“, потенцираше Премиерот Заев.
Генералниот Секретар на НАТО, Јенс Столтенберг на средбата му честиташе на Премиерот Заев за успехот со договорот од Преспа и неговата имплементација
По средбата Премиерот Заев и секретарот Столтенберг одржаа заедничка прес-конференција.
Истакнувајќи дека ова е негова прва посета на НАТО по потпишувањето на Протоколот за пристапување на Република Северна Македонија во Алијансата, Премиерот Заев потенцираше дека земјата постигна една од стратешките заложби, секако со поддршка со партнерите и пријателите во НАТО.
„Во нашата земја многу генерации напорно работеа на остварувањето на оваа наша историска цел и достигнување. Нашите аспирации за членство во НАТО секогаш имале висок степен на одобрување и поддршка од најширокиот спектар на нашето општество. Така е и денес“, рече Премиерот Заев.
Членството во НАТО, како што истакна Премиерот Заев, за Република Северна Македонија отвора нова и безбедна перспектива, но, како што додаде Премиерот Заев носи и нови обврски и одговорности, коишто Република Северна Македонија, наскоро како полноправна членка на Алијансата, е целосно подготвена да ги прифати.
На прес-конференцијата Премиерот Заев посочи дека земјата прави големи чекори за зајакнување на капацитетите на Армијата. Премиерот Заев рече дека во 2018 година буџетот за одбранбените сили е зголемен за 14% и дека целта на Владата е најдоцна до 2024-та година, 2% од БДП да се наменува за современи армиски сили кои во секој поглед ќе бидат рамноправни со своите сојузници во НАТО.
„Оваа наша цел ќе ни помогне да го зголемиме нашето учество во мисиите предводени од НАТО, како и нашата партиципација во командните и политичките структури на алијансата. Тоа е приоритет за нас, кога стануваме полноправна членка на Алијансата. Подготвени сме да продолжиме да соработуваме со сите НАТО сојузници за да го преземеме нашиот дел од заедничките обврски и одговорности, како 30-тата земја-членка, за да обезбедиме свој придонес за понатамошно обликување на Западен Балкан во мирен, просперитетен и демократски регион“, додаде Премиерот Заев.
Во завршницата на својата изјава пред медиумите Премиерот Заев рече дека членството на Република Северна Македонија во НАТО дополнително ќе придонесе за стабилноста и безбедноста во Југоисточна Европа и ќе биде инструмент за креирањето на нова, позитивна слика за регионот.
„Процесите што ги поминавме не беа лесни, но беа исклучително важни за иднината на нашата земја. Договорите склучени со нашите соседи Бугарија и Грција се непобитен доказ за нашата зрелост. Тие договори се темелите за идниот развој на силното партнерство што го започнавме и што биде од придонес за понатамошно зачувување и зајакнување на регионалната безбедност и стабилност. Ние сме подготвени да ги поддржиме сите земји од нашето соседство во исполнувањето на овие стратешки цели од интерес на граѓаните од регионот кои делат заеднички вредности: посветеност на демократијата, слободата, слободна пазарна економија, почитувањето на човековите права и владеењето на правото’, заклучи Премиерот Заев.
Посочувајќи дека пристапниот протокол за полноправно членство на Република Северна Македонија веќе го потпишале осум земји членки на Алијансата, Генералниот Секретар на НАТО, Јенс Столтенберг на прес-конференцијата рече дека членство на Северна Македонија во НАТО ќе придонесе за стабилноста на целиот регион.
Генералниот секретар на НАТО, Јенс Столтенберг на прес-конференцијата упати охрабрување до Владата на Република Северна Македонија да продолжи за започнатиот реформски процес.
Инаку досега пристапниот протокол за членство на Република Северна Македонија во НАТО го потпишаа неколку земји членки на Алијансата, односно Грција, Бугарија, Албанија, Словенија, Хрватска, Црна Горна, Романија и Литванија.
Премиерот Заев од НАТО: Членството во Алијансата значи сигурна иднина, Република Северна Македонија е целосно подготвена да ги прифати обврските и одговорностите кои ќе ги донесе полноправното членство
Претседателот на Владата на Република Северна Македонија, Зоран Заев денеска во седиштето на НАТО, во Брисел се сретна со Генералниот Секретар Јенс Столтенберг. По средбата Премиерот Заев и секретарот Столтенберг одржаа заедничка прес-конференција.
Истакнувајќи дека ова е негова прва посета на НАТО по потпишувањето на Протоколот за пристапување Република Северна Македонија во Алијансата, Премиерот Заев потенцираше дека земјата постигна една од стратешките цели, секако со поддршка со партнерите и пријателите во НАТО.
Во продолжение Ви го пренесуваме текстот на изјавата на Премиерот Заев на прес-конференцијата со Генералниот Секретар на НАТО, Столтенберг.
„Генералниот Секретар Јенс Столтенберг има посебно место со довербата и охрабрувањето што ни ги пружаше за време на целиот тој процес.
Во нашата земја многу генерации напорно работеа на остварувањето на оваа наша историска цел и достигнување. Нашите аспирации за членство во НАТО секогаш имале висок степен на одобрување и поддршка од најширокиот спектар на нашето општество.
Така е и денес.
Сакам да напоменам дека ние знаеме дека членството во НАТО отвора нова и сигурна безбедносна перспектива за наша земја.
Истовремено, целосно сме подготвени да ги прифатиме и новите обврски и одговорности кои произлегуваат од нашиот статус наскоро како полноправна членка.
Како идна членка на НАТО, правиме сериозни чекори за зајакнување на капацитетите на нашата армија. Во 2018 година го зголемивме буџетот на нашите одбранбени сили за 14%, и остануваме посветени да ја оствариме нашата цел и најдоцна до 2024 година да обезбедиме 2% од нашиот БДП да оди за современи армиски сили кои во секој поглед ќе бидат рамноправни со своите сојузници во НАТО.
Оваа наша цел ќе ни помогне да го зголемиме нашето учество во мисиите предводени од НАТО, како и нашата партиципација во командните и политичките структури на алијансата.
Тоа е приоритет за нас, кога стануваме полноправна членка на Алијансата.
Подготвени сме да продолжиме да соработуваме со сите НАТО сојузници за да го преземеме нашиот дел од заедничките обврски и одговорности, како 30-тата земја-членка, за да обезбедиме свој придонес за понатамошно обликување на Западен Балкан во мирен, просперитетен и демократски регион.
Убедени сме дека нашето членство во НАТО дополнително ќе придонесе за стабилноста и безбедноста во Југоисточна Европа и ќе биде инструмент за креирањето на нова, позитивна слика за регионот.
Процесите што ги поминавме не беа лесни, но беа исклучително важни за иднината на нашата земја. Договорите склучени со нашите соседи Бугарија и Грција се непобитен доказ за нашата зрелост.
Тие договори се темелите за идниот развој на силното партнерство што го започнавме и што биде од придонес за понатамошно зачувување и зајакнување на регионалната безбедност и стабилност.
Ние сме подготвени да ги поддржиме сите земји од нашето соседство во исполнувањето на овие стратешки цели од интерес на граѓаните од регионот кои делат заеднички вредности: посветеност на демократијата, слободата, слободна пазарна економија, почитувањето на човековите права и владеењето на правото.
Република Северна Македонија ќе продолжи да биде сигурен сојузник во заштитата на овие вредностите.
Нашиот позитивен придонес за нашиот регион и за пошироките интереси на НАТО, како нова 30-та земја-членка, ќе биде видлив и сигурен“.
