Во Владата на Република Македонија вчера (среда, 11 април 2012 година) се одржа редовна седница на Комитетот за туризам со која претседаваше претседателот на Владата, г-дин Никола Груевски.

На седницата се разговараше за предлог Стратегијата за рурален туризам во која е направена анализа на трендовите во руралниот туризам, како и анализа на состојбите во Република Македонија во оваа област, при што врз основа на податоците добиени од истражувањата се дадени препораки за усвојување на моделот на стандардизација и усогласување на Еурогитес на руралниот туризам во Република Македонија.

Исто така, на Комитетот за туризам се дискутираше и за повеќе прашања кои се однесуваат на промовирање на македонскиот туризам во различни земји, потоа привлекување на нискобуџетни познати имиња од хотелиерството во рамки на коридорите 8 и 10, како и подобрување на условите за туристичко сместување во ловните домови, детските и работничките одморалишта, како и авто камповите.

Воедно, на седницата се разговараше и за активностите кои се преземаат за ширење на мрежата на туристички информативни центри низ државата, отворањето на мали пристаништа за забава и риболов, како и за интересот кој го пројавуваат инвеститорите за отворање на традиционални македонски ресторани, продавници за сувенири и облека.

Во таа насока Комитетот за туризам во следниот период ќе ја разгледа можноста за ангажирање на консултантски куќи кои би им дале поддршка на граѓаните и компаниите во Република Македонија за користење на ИПА и ИПАРД фондовите кои се однесуваат на проекти за промоција и поддршка на туризмот.