Претседателот на Владата на Република Македонија, г-дин Никола Груевски, денеска (сабота, 18 јануари 2014 година) оствари средба со заменик претседателот на Владата на Република Турција, г-дин Емрулах Ишлер.

На средбата беа потврдени одличните пријателски односи помеѓу двете држави, како на политички така и на економски план. Соговорниците искажаа задоволство од досегашната соработка која се одвива на повеќе полиња и на повеќе проекти.

Премиерот Груевски посочи дека Република Македонија е отворена за турските инвеститори кои во државата гледаат атрактивна бизнис дестинација што може да се заклучи и од досегашните конкретни инвестиции на повеќе турски компании, и ги истакна поволностите за инвестирање кои ги нуди државата како основа за јакнење на економските односи помеѓу државите.

Премиерот посочи дека со Турција освен искористување на економските потенцијали не поврзуваат и повеќе значајни проекти од областа на културата, образованието, земјоделието.

Премиерот Груевски се осврна и на приоритетите на државата во поглед на надворешната политика, поконкретно за нашите евроатлански интеграции и реформите кои се преземаат на тој план, а кои беа верификувани со новата препорака и петтиот позитивен извештај на Европската Комисија.

Турскиот заменик претседател на Влада, г-дин Емрулах Ишлер истакна дека му е исклучително драго што е во посета на пријателска Република Македонија со која Турција споделува пријателски политички и економски односи.

Тој посочи дека турската Влада активно делува на поттикнување на интересот за инвестиции и за остварување на интензивна економска и трговска соработка меѓу двете држави.

Тој истакна дека Турција останува искрен и активен поддржувач на европските и евроатланските интегративни процеси на Република Македонија.

Соговорниците ги реафирмираа и заедничките заложби за остварување на продлабочена соработка во областите од заеднички интерес.