Во радовишкото село Ораовица ќе се гради кејот на Ораовичка Река со финансии преку Агенцијата за рурален развој. За таа цел Општината ќе аплицира за средства до Министерството за земјоделство. Тоа го побараа жителите на селото на денешната средба со претседателот на ВМРО-ДПМНЕ Никола Груевски, министерот за транспорт и врски Владо Мисајловски, заменик-министерот за земјоделство Ванчо Костадиновски и претставници од повеќе институции.

Во Ораовица е во тек изградба на повеќенаменско игралиште, инвестиција на Општината во износ од 10 милиони денари.

Градоначалникот на Радовиш Сашо Николов го информираше Груевски дека игралиштето ќе биде готово до 15-ти следниот месец. Игралиштето ќе биде со гумирана подлога, трибини и професионално осветлување.

На барање на жителите Општината ќе аплицира за финансии од Владата и за изградба на детско катче. Изградбата, како што беше најавено, ќе треба да почне до десетти следниот месец. Дел од 16-те милиони денари што се одвоени за Општина Радовиш ќе бидат пренаменети за изградба на детско катче. Тендерската постапка е во тек и се очекува градбата да почне до крајот на следниот месец. Со финансиска поддршка од Владата, претходно во Ораовица се обновени училиштето и спортската сала, реконструиран е Домот на културата,  изградени четири патишта. Со пари од Владата се гради и патот до манастирот.

На средбата жителите побараа да им се излезе во пресрет за проблемот со впишување во Катастар на 400 од вкупно 600 објекти во селото. Тие кажаа дека го пропуштиле рокот и побараа да добијат таква можност и да се намалат трошоците.

Министерот Мисајловски најави средба со раководството на Катастарот и информира дека за да се реализира барањето на жителите се потребни измени на повеќе закони. 

Земојделците и тутунопроизводителите истакнаа дека се задоволни од исплатата на тутунот. Заменик министерот за земјоделство Костадиновски рече дека досега се исплатени 10 милиони евра за субвенции од кои 2 милиони евра за земјоделците и тутунарите.