Претседателот на Владата на Република Македонија, Зоран Заев, придружуван од министерот за надворешни работи Никола Димитров денеска се сретна со Борге Бренде, министер за надворешни работи на Кралството Норвешка, придружуван од делегација од Норвешка и од амбасадорот на Кралството Норвешка за Македонија, Арни Бјорнстад.

На средбата е оценето дека новата реформска демократска Влада отвора нови можности за Република Македонија, како за квалитетот на живот на граѓаните, така и за евро-атлантските интеграции.

„Правиме исчекор кон евро-атлантските интеграции. Владата работи посветено на реформите и на демократските вредности што ги отвораат перспективите на земјата и на граѓаните на нашата држава, затоа што иднината на Република Македонија е во Европската унија и НАТО“ рече премиерот Заев.

  На средбата се нагласени како важни реформите што обезбедуваат владеење на правото и независни институции.

Министерот за надворешни работи на Норвешка, Бренде ги поздрави инклузивните политики на премиерот Заев, што се во насока на политичката култура што ја негува демократскиот свет. Констатирано е дека таквите отворени политики се во интерес на политичката стабилизација на Македонија, евро-атлантскиот пат и економски развој на земјава.

Министерот на надворешни работи Бренде, најави дека Норвешка е подготвена и на конкретно ниво да ги помогне неопходните реформи за Република Македонија.

Претседателот на Владата на Република Македонија, Зоран Заев, се заблагодари за принципиелната поддршка што и ја дава Кралството Норвешка на Република Македонија во демократските процеси, како и за поддршката на Македонија во стратешките определби за членство во НАТО и ЕУ.