Претседателот на Владата на Република Македонија, Зоран Заев, вчера доцна попладне имаше одделни средби со в.д. градоначалникот на Општина Струга, Мустафа Забзун, и градоначалникот на Општина Охрид, Никола Бакрачески, во придружба на нивните најблиски соработници.

На средбите, на кои присуствуваше и Министерот за финансии Драган Тевдовски градоначалниците на Струга и Охрид изразија голема благодарност до премиерот Заев, кој, на негова иницијатива, ги покани првите луѓе на двете општини за да разговараат и да најдат решенија за проблемите со кои се соочуваат овие два града, во интерес на граѓаните.

Еден од заедничките проблеми за кои стана збор на оваа средба се проблемите во финансиското работење на двете единици на локална самоуправа кои се соочуваат со хроничното блокирање на сметките на општините, заради долговите кои се создадени од повеќе причини. Во најголема мерка долговите на Охрид и Струга произлегуваат од кумулираните обврски заради ненавременото подмирување на кредитот од Европската банка за обнова и развој, кој во 1998 година го договори тогашното Министерство за трговија за изградбата на колекторот за прочистување на Охридското Езеро, а кое потоа отплатата на овој кредит им го префрли на општините.

Премиерот Заев, кој соопшти дека е детално запознаен со генезата на овој проблем, покажа особен интерес и иницијатива за пронаоѓање на решение за овие горливи прашања на двете општини. Во отворената дебата за овие ситуации, во која активно се вклучи и Министерот Тевдовски, беа разгледани повеќе опции како излезни решенија, кои во исто време ќе бидат и трајни и нема да создаваат последици за нови задолжувања. Претседателот на Владата на Република Македонија изрази подготвеност овие проблеми да се решат многу бргу за да можат двете општини да се растеретат од ова прашање и за да можат без финансиски хипотеки да ги спроведуваат развојните политики за кои и двата града имаат сериозни потенцијали.

Премиерот Заев на двете средби со в.д. градоначалникот на Струга и со градоначалникот на Охрид, ја најави подготвеноста на владата да најде решение управувањето на колекторот за прочистување на Охридското Езеро да биде изземено од надлежноста на општините, бидејки, како што нагласи премиерот, грижата за ова природно богатство заштитено со УНЕСКО, повеќе не смее да биде препуштено на ризиците од загадување. Покрај тоа што едно такво решение ќе го олесни работењето на општините Струга и Охрид, премиерот соопшти дека ќе биде подготвен детален проект за негова реконструкција и доградба, за трајна заштита на водите на Охридското Езеро.

Градоначалникот на Охрид, Бакрачевски, изразувајки ја уште еднаш неговата благодарност за исклучително конструктивната поддршка и разбирање на премиерот Заев, замоли за асистенција на владата и во поглед на решавање на прашањето на регионалната депонија за отпад. Ова исто прашање беше од интерес и на општинската делегација од Струга. Премиреот Заев истакна дека и ова прашање е од врвен приоритет како придонес на владата за поддршка во решавањето на проблемите на единиците на локалната самоуправа, во интерес на граѓаните. Тој соопшти дека, како интервентни, ќе бидат преземени краткорочни мерки, кои ќе бидат само прва фаза од трајното решавање на овој проблем, за кој владата интензивно е во потрага по најдобра солуција, не само за Охрид и Струга, туку за сите плански региони.

Премиерот Зоран Заев на двете повеќечасовни средби, прифати во најкус можен рок владата и надлежните мнистерства да ги разгледаат информациите за други важни прашања од животот на граѓаните во Охрид  и Струга, како и за функционирањето на двете локални администрации. Уште повеќе, нагласи Претседателот на Владата, тој очекува предлози за решенија од раководството на двете самоуправи, бидејки, порача премиерот, тие најдобро ги знаат проблемите. Премиерот Зоран Заев вети дека на тие информации и предлози со решенија ќе им биде пристапено одговорно, и дека ќе бидат земени предвид, доколку се во согласност со законските  надлежности на Владата на Република Македонија.

Премиерот Зоран Заев им порача на двете делегации на општините Струга и Охрид дека вратите на Владата на Република Македонија се отворени за нив, како и за сите други општини и дека во прв план на актуелната влада е интересот и решавањето на проблемите на граѓаните во сите општини, без разлика на тоа која политичка партија е на чело на локалната самоуправа.