Конфедерацијата на слободни синдикати КСС наредната година ќе се обиде да најде заедничко решение со Владата околу предлогот да се дадат повеќе услови за пензионирање, а не само старосната граница, ќе иницира измени во Законот за работни односи за унапредување на правата на работниците, а ќе преговара и за потпишување на Колективниот договор за јавниот сектор.

Претседателот на КСС, Ратко Мишковски на денешната прес-конференција истакна оти се надева дека со Владата ќе најдат заеднички решенија и дека ќе продолжи социјалниот дијалог онака како што тоа било случај годинава.

- Постигнавме заеднички решенија по многу прашања, а можеби најзначајно е утврдувањето на минималната плата. Законот за нејзино утврдување наскоро треба да се донесе во Собранието, а со тоа ќе се унапредат правата на многу работници, рече Мишковски.

Тој е задоволен и од функционирањето на Економско социјалниот совет, тело на кое, како што рече, биле поставени многу прашања и предлози од кои голем дел Владата ги прифатила.

Министерот за труд и социјална политика Спиро Ристовски се согласува дека социјалниот дијалог функционира добро и го дели ставот дека резултат на таквото функционирање е утврдувањето на минималната плата, нешто, на кое, како што рече, се чекало 20 години.

Најави оти и во иднина дијалогот со партнерите ќе продолжи во интерес на работниците, но притоа рече оти нема да се заборават и потребите на работодавачите. На таков начин, рече, ќе се создаде добра економска клима во земјава која ќе биде во корист на сите.