Се заокружува реализацијата на првата фаза од реформскиот План 3-6-9 на Владата на Република Македонија, најголем дел од предвидените мерки за првиот тримесечен рок, дури 46 се веќе реализирани, а останатите 27 се во фаза на реализација и ќе бидат завршени до крајот на септември, кога ќе биде подготвен и конкретен Извештај за сработеното.

Ова е констатирано на денешната, трета по ред, Министерска средба на Владата на Република Македонија, што ја предводи премиерот Зоран Заев, на којашто е заклучено дека Владата одговорно и доследно ги спроведува преземените обврски за реформите важни за евро-атлантските интеграции.

- Посветеноста на Владата на реформскиот процес според Планот 3-6-9 е високо почитувана од Европската унија, којашто врз основа на нашите енергични активности за обезбедување квалитетен живот за граѓаните и за евро-атлантските перспективи, со отворен оптимизам цени дека Република Македонија е пред најголемата шанса досега за напредок и успех, рече премиерот Заев.

Претседателот на Владата, Заев, во обраќањето пред министрите, се заблагодари за нивните ангажмани, со коишто ги поттикнуваат ваквите перцепции во Брисел и мотивираноста на земјите членки да ја поддржат Република Македонија во остварувањето на стратешките цели, членство во ЕУ и НАТО.

- Република Македонија веќе ја поставивме во фокусот на домашните и странските инвеститори, затоа што со нашите принципиелни политики станавме земја пријателка на регионално и меѓународно ниво. Планот 3-6-9 е вредна работа и треба да сме среќни што сме вклучени во неговата реализациа, рече премиерот Заев.

На средбата, осврт на досега сработеното даде заменик претседателот на Владата задолжен за европски прашања, Бујар Османи, а во дискусијата за сработеното во делот на организирањето фер и регуларни избори, правосудниот систем, медиумите, постигнувањето институционална независност, реформите на разузнавачките и безбедносните служби, борбата против организираниот криминал и корупцијата, реформата на јавната администрација реферираа ресорните министри.

Паралелно со заокружувањето на реформите предвидени во првиот тримесечен рок, на средбата е констатирано дека веќе се почнати активности и за новиот 6 месечен рок од Планот. Заклучено e да се побара активно вклучување на сите надлежни институции во процесот, за да може тие да се дефинираат пред локаните избори со цел да се овозможи планираната реализација до април следната година.

На средбата е утврдено да се земат предвид сите забелешки од Извештајот на европскиот експерт Рајнхард Прибе, што се очекува кон крајот на следната недела, во дефинирањето на реформските приоритети за 6-месечниот и 9 месечниот рок од Планот 3-6-9.

- Да продолжиме да работиме со овој ентузијазам и со позитивната енергија како досега, бидејќи се реални шансите ЕК да ја тргне условеноста на препораката за Република Македонија на есен, а следен чекор да биде датум за почеток на преговори со ЕУ и напредок во НАТО интеграциите, порача премиерот Зоран Заев на средбата со Министерската група задолжена за реализација на реформскиот План 3-6-9.