Претседателот на Владата на Република Макеоднија, Зоран Заев, придружуван од министерот за надворешни работи, Никола Димитров и министерот задолжен за дијаспора, Едмонд Адеми, оствари средба со добитникот на нобеловата награда за физиологија и медицина, Ферид Мурад.

На средбата се разговараше за визиите на Владата за мултиетничко општество – едно општество за сите, за реформските процеси, обновените добрососедски односи со соседните држави, како и за евро - атлантските аспирации на Македонија.

На ова, професорот Мурад истакна дека светот веќе збрува позитивно за Република Макеоднија и укажа дека остварувањето на eвро - атлантските интеграции на земјата ќе и донесе перспектива и инвестиции, неопходни за создавање нови можности за подобра иднина за младите и 
ќе ги привлечат иселените да се вратат и да делуваат во својата земја.

Нобеловецот Мурад, во текот на средбата, на премиерот Заев му предочи конструктивни предлози за подобрување на образовниот и здравствениот систем, како и отворањето на 
научно - истражувачки центри, споделувајќи лични искуства од САД и од повеќе земји во светот, каде што тој работел, се усовршувал и кадешто веќе долги години е професор на
повеќе универзитети.

Ферид Мурад е светски признат лекар и фармацевт, добитник на Нобелова награда за физиологија и медицина во 1998 година. Води потекло од гостиварското село Лакавица, 
токму заради оваа врска и гостиварската болница го носи неговото име. Автор е на голем број научни трудови од областа на клиничката фармакологија.