Потпишан меморандум за соработка со Канцеларијата за услуги на проекти на Обединетите нации - UNOPS и со Министерството за надворешни работи на Кралството Норвешка, за конечно решавање на проблемот со линдан

Премиерот Зоран Заев во име на Владата на Република Македонија денеска го потпиша Меморандумот за соработка со Канцеларијата за услуги на проекти на Обединетите нации - UNOPS и со Министерството за надворешни работи на Кралството Норвешка претставувано од Амбасадата на Кралство Норвешка за Србија, Македонија и Црна Гора.

Успешната имплементација на проектот има за цел создавањето на заеднички Фонд, како системски механизам за расчистување на индустрискиот токсичен отпад во поранешната фабрика ОХИС во согласност со европските стандарди, хармонизација во полето на заштита на животната средина и промоцијата на град Скопје како безбеден, отпорен и одржлив град.

„Веќе е познато дека одредена количина од овој опасен пестицид со години е затрупан во кругот на фабриката и претставува закана за животната средина. Република Македонија, со потпишување на Стокхолмската конвенција во 2004-тата година, во којашто линданот како токсична материја е додаден во 2009-та година, e обврзана да го реши овој проблем. И затоа час поскоро мора да го дислоцираме отпадот без последици врз околината и врз граѓаните“, истакна премиерот Заев.

Потенцирајќи дека здравата и чиста животна околина се едни од основните предуслови за квалитетен живот на сите, премиерот Заев истакна дека Владата и сите други надлежни институции се определени да создадат средина во којашто граѓаните ќе живеат без да се грижат каков воздух дишат или што се крие под земјата којашто ја газат. 

Процесот за конечно решавање на проблемот со илјадниците тони отпад од опасниот пестицид линдан во поранешната фабрика Охис, ќе го води Генералниот Секретаријат на Владата на Република Македонија. 

 

 

Според Генералниот секретар Рашковски, можни се три решенија за трајно решавање на проблемот со линдан во поранешната фабрика Охис, за чија реализација ќе бидат потребни од 40 до 260 милиони евра. 

„Во зависност од собраните средства ќе зависи изборот на методот кој ќе го користиме за уништување на отпадот од опасниот пестицид линдан. Сакам да истакнам дека истовремено ќе се чистат двете депонии во поранешната фабрика Охис и очекуваме дека тој процес ќе трае од 3 до 5 години“, истакна Генералниот Секретар на Владата на Република Македонија, Драги Рашковски. 

Амбасадор на Кралството Норвешка за Македонија, Србија и Црна Гора Арне-Санес Бјорнстад истакна дека неговата земја е задоволна што може да ѝ помогне на Република Македонија за да ја дислоцира најцрната еколошка точка во земјата. Истакнувајќи дека безбедноста на граѓаните е на прво место, амбасадорот Бјорнстад посочи исто така овој процес дополнително ќе го олесни патот на Република Македонија во Европската Унија.   

На денешното потпишување на Меморандумот за соработка помеѓу Владите на Република Македонија и на Норвешка, како и со Канцеларијата за услуги на проекти на Обединетите нации - UNOPS, присуствуваа и амбасадорите на неколку европски земји, потоа Никола Бертолини, раководител на секторот за соработка на Делегацијата на Европска Унија, како и претставници на организациите на Обединетите нации присутни во земјава.
 


Во продолжение интегрално ви го пренесуваме текстот од изјавата на премиерот Заев за медиумите: 

 

 

„Денеска заедно со Канцеларијата за услуги на проекти на Обединетите нации - UNOPS и со Министерството за надворешни работи на Кралството Норвешка претставувано од Амбасадата на Кралство Норвешка за Србија, Македонија и Црна Гора започнуваме соработка којашто ќе придонесе за успешна реализација на проектот за расчистување на индустрискиот токсичен отпад или линдан, во поранешната фабрика Охис во согласност со европските стандарди.

Веќе е познато дека одредена количина од овој опасен пестицид со години е затрупан во кругот на фабриката и претставува закана за животната средина. 

Република Македонија, со потпишување на Стокхолмската конвенција во 2004-тата година, во којашто линданот како токсична материја е додаден во 2009-та година, e обврзана да го реши овој проблем.

И затоа час поскоро мора да го дислоцираме отпадот без последици врз околината и врз граѓаните.

Здравата и чиста животна околина се едни од основните предуслови за квалитетен живот на сите. И затоа цврсто сме определени за нашите сограѓани да создадеме средина во којашто ќе живеат без да се грижат каков воздух дишат или што се крие под земјата којашто ја газат. Мора да сториме сѐ за да го заштитиме единственото нешто што нема цена, а тоа е здравјето на граѓаните“.