Заменик-министерот за животна средина и просторно планирање, Јани Макрадули денеска оствари работна средба со градоначалникот на Шуто Оризари, Курто Дудуш, на која се разговараше за поддршката што општината ја доби од Планот за чист воздух.

Во општина Шуто Оризари, предвидените мерки од Планот за чист воздух ќе опфатат промена на старите прозорци и врати во зградата на општината, со цел да се подобри енергетската ефикасност на објектот, со што ќе се овозможи заштеда на топлинска енергија, како и заштеда на општинските буџетски средства.

Поддршката што општината ја доби од Планот за чист воздух, за реализација на оваа мерка е во вредност од 1 милион денари.

Дополнително од Планот за чист воздух, за Општина Шуто Оризари се издвоени 500.000 денари за хортикултурно уредување и реконструкција на дворната површина со зелена површина во ОУ „Браќа Рамиз и Хамид”.

Со оваа активност ќе се засадат плодородни дрвја, како бадем, лешник, дуња, како и зимзелени садници, украсни грмушки, со комплетен систем за одржување.