Во рамките на престојот во Париз, денеска, министерот за надворешни работи на Република Македонија, Никола Попоски, оствари средба со советникот за надворешна политика во Кабинетот на Претседателот на Француската Република, Жан-Давид Левит.

На средбата, министерот Попоски ги презентираше очекувањата на Република Македонија за членство во НАТО, како и за почеток на пристапните преговори со Европската унија. Притоа, ги презентираше и правните аспекти на пресудата од Меѓународниот суд во Хаг, очекувајќи дека овој значаен аргумент ќе биде соодветно прифатен и поддржан од земјите-членки на НАТО и на ЕУ. Министерот Попоски изрази и надеж дека ќе биде задржан  кредибилитетот на процесот на проширување со земјите од Западен Балкан, а Република Македонија ќе продолжи активно да придонесува во регионалната стабилност и безбедност, доследно спроведувајќи ги зацртаните реформи во европските и евроатлатнтските интегративни процеси.

Од своја страна Левит, ги реафирмира ставовите на Франција за активна поддршка на процесите на проширување со земјите од регионот, а во тој контекст и со Република Македонија, како кредибилен партнер во Југоисточна Европа.