Вицепремиерката Царовска: Во мај и јуни поддржани се над 5.000 занаетчии со мерката за субвенционирање на минимална плата

Заменичката на претседателот на Владата задолжена за економски прашања Мила Царовска денес се сретна со преставници на фризерските салони со коишто разговараше за нивното работење за време на корона кризата.

Царовска на средбата истакна дека во изминатиот период Владата донесе три сета економски мерки со коишто освен микро, малите и средните бизниси беа опфатени и занаетчиите, односно самостојните вршители на дејност.

„Како одговорна Влада при носењето на мерките водевме сметка да бидат опфатени што поголем дел од бизнисите. Според последните податоци над 5.000 занаетчии во месеците мај и јуни ја искористија мерката за финансиска помош за исплата на плати од 14.500 денари. Со оваа мерка на занаетчиите кадешто влегуваат и фризерите им овозможивме полесно премостување на периодот кога целосно не работеа“, посочи вицепремиерката Царовска.

На средбата се дискутираше и за идните предизвици и мерки за олеснување на работата на фризерите и другите самостојни вршители на дејност.