По повод одбележувањето на Денот на победата над фашизмот денеска цвеќе беше положено пред споменикот на Методија Андонов Ченто на плоштадот Македонија во Скопје, кој бил македонски национален борец, деец и политичар и прв претседател на Президиумот на АСНОМ. Поради неговата функција на претседател на Президиумот на АСНОМ, Ченто се смета и како прв претседател на Македонија.

Пред споменикот поставен на плоштадот на главниот град цвеќе положија членови на неговото семејство, државна делегација составена од министрите за надворешни работи, за внатрешни работи и за здравство, Никола Попоски, Гордана Јанкуловска и Никола Тодоров,  делегација од Кабинетот на претседателот на Република Македонија, на министерството за одбрана и ГШ, на ВМРО-ДПМНЕ, како и словенечкиот амбасадор Алан Берган. На положувањето цвеќе присуствуваа и американскиот амбасадор Пол Волерс и други амбасадори и членови на дипломатскиот кор во Скопје.

Според, Антонио Милошоски, кој ја предводеше партиската делегација на ВМРО-ДПМНЕ, овој македонски великан го има дадено својот придонес за да го прославуваме денешниот Ден на Европа и денот на победата над фашизмот.

- Тоа се деновите кога победи европската слобода и европската демократија. Но тие слободи и демократии не се дадени и загарантирани еднаш засекогаш, туку треба да се одржуваат и сите треба да го дадеме нашиот придонес за нивно зачувување, изјави Милошоски.

Но, на денешниот ден на Европа, додаде тој, за жал имаме причини и да бидеме загрижени бидејќи во некои европски земји на денот на победата над фашизмот гледаме дека во некои европски парламенти влегуваат партии со профашистичка идеологија.

- Тоа треба да биде предупредување за секој вистински европеец дека работата, слободата, демократијата не се нешто што е дадено еднаш засекогаш туку мора да работиме упорно за европската слобода, изјави Милошоски.