Владата на Република Северна Македонија го гледа приватниот сектор како свој партнер, затоа со внимание ќе ги слушам сите ваши препораки за подобрување на бизнис климата, ова го истакна заменик-претседателот на Владата на Република Северна Македонија задолжен за економски прашања, Фатмир Битиќи, на средбата со новото претседателство на Стопанската комора на северозападна Македонија и нејзиниот претседател Менди Ќира.

На средбата акцентот на бизнисмените на СКСЗМ беше ставен на барањето за зголемување на квотата за работници од странство, за што вицепремиерот Битиќи рече дека овој проблем е веќе детектиран од негова страна и дека веќе е отпочната дискусијата и барањето на соодветниот модалитет со кој ова ќе го постигнеме.

„Либерализацијата на пазарот на труд е потребна за зголемување на продуктивноста и конкурентноста на економијата. Во следните неколку месеци треба да направиме проценка кои се секторите во кои е потребна дополнителна работна сила и да видиме колку бројка е потребна. Во исто време заедно со приватниот сектор засилено да работиме на реквалификација и доквалификација на домашниот пазар на труд со цел тие да можат да бидат поконкурентни и пазарот да може полесно да ги впие“, истакна Битиќи.

На состанокот се разговараше и за идентификацискиот број за граѓаните од Отворен Балкан со што дополнително ќе се олесни движењето на граѓаните помеѓу нашите земји.