Заменичката на претседателот на Владата задолжена за политики за добро владеење, Славица Грковска, ја предводеше владината делегација за одбележување на 11 Октомври во Скопје, во чиј состав беа и Филип Николовски, заменик министер за финансии и Беким Реџепи, заменик министер за транспорт и врски. 

Делегацијата положи цвеќе во Меморијалниот комплекс „Партизански гробишта“ во Бутел и пред споменикот „Ослободители на Скопје“ на платото пред Владата на Република Северна Македонија.  

„11 Октомври е денот кога нашата борба за ослободување, самобитност и државност нераскинливо се поврза со борбата против фашизмот и стана дел од големата победа над таа погубна идеологија во Втората светска војна. Многу е важно тоа чувство и мудрост за вистинска определба да го задржиме и во овие тешки и кризни времиња со кои се соочува целиот свет, времиња кои ни покажуваат дека борбата за мир, слобода и напредок продолжува и дека таа е должност на секоја генерација.“ изјави вицепремиерката Грковска на Денот на народното востание, кој годинава се одбележува под мотото „ Непокор и слобода“.  

Таа истакна дека бројните животи дадени во антифашистичката и народноослободителна војна, оние млади борци кои со верба, срце и највисоки идеали се вградија во нашата слободарска историја, треба да бидат наша вечна инспирација и мотив да истраеме во денешните битки за подобро утре.  

„Да не потклекнеме пред предизвиците со кои се соочуваме, и обединети и храбро, во интерес на перспективната иднина на нашите граѓани, да ги носиме вистинските одлуки“, порача вицепремиерката Грковска и додаде дека изразувајќи ја благодарноста кон тие што овозможија да живееме во слободна и независна држава, треба да сме свесни и за обврската да го зачуваме постигнатото и да го надградиме со нови постигнувања и подалечни дострели кои значат напредок и развој за сите наши граѓани и идни генерации.